எர்ணாகுளம் - வேளாங்கண்ணி சிறப்பு எக்ஸ்பிரஸ் ரெயில் பேராவூரணியில் நிறுத்தம்

பேராவூரணி:-

பேராவூரணியில் எர்ணாகுளம், வேளாங்கண்ணி சிறப்பு எக்ஸ்பிரஸ் ரெயில் நின்று சென்றதற்கு பயணிகள் வரவேற்பு தெரிவித்துள்ளனர்.

வாராந்திர ரெயில்

எர்ணாகுளத்தில் இருந்து வேளாங்கண்ணிக்கு வாராந்திர சிறப்பு எக்ஸ்பிரஸ் ரெயில் இயக்கப்பட்டு வருகிறது. இந்த வாரந்திர சிறப்பு எக்ஸ்பிரஸ் ரெயில் அடுத்த மாதம் (ஆகஸ்டு) 6-ந் தேதி வரை இயக்கப்பட உள்ளது. இந்த ரெயில் குறிப்பிட்ட சில நிலையங்களில் மட்டுமே நின்று செல்லும் என அறிவிக்கப்பட்டு இயக்கப்பட்டு வந்தது. பேராவூரணி ரெயில் நிலையத்தில் சிறப்பு எக்ஸ்பிரஸ் ரெயில் நிற்காததால் பயணிகள் ஏமாற்றம் அடைந்தனர். பேராவூரணியில் நின்று செல்ல வேண்டும் என பயணிகள் வலியுறுத்தி வந்தனர்.

வரவேற்பு

இந்த நிலையில் பயணிகளின் கோரிக்கையை ஏற்று பேராவூரணி ரெயில் நிலையத்தில் எர்ணாகுளம்-வேளாங்கண்ணி வாராந்திர எக்ஸ்பிரஸ் ரெயில் ஜூன் 11-ந் தேதி முதல் நின்று செல்லும் என தென்னக ரெயில்வே அறிவிப்பு வெளியிட்டது.

அதன்படி பேராவூரணியில் நின்று செல்லும் வகையில் ரெயில் இயக்கப்பட்டு வருகிறது. இதற்கு பயணிகள் வரவேற்பு தெரிவித்துள்ளனர். பேராவூரணியில் ரெயில் நின்று சென்றதையொட்டி பல்வேறு அமைப்பினர் சார்பில் ரெயில் என்ஜின் டிரைவர்களுக்கு சால்வை அணிவிக்கப்பட்டது.