பாஞ்சாலங்குறிச்சி வீரசக்கதேவி ஆலய விழா:விதிகளை மீறிய 19 வாகன உரிமையாளர்கள் மீது நடவடிக்கை

பாஞ்சாலங்குறிச்சியில் சில நாட்களுக்கு முன்பு வீரசக்க தேவி கோவில் திருவிழா நடந்தது. இவ்விழாவை முன்னிட்டு மாவட்ட போலீஸ் சூப்பிரண்டு பாலாஜி சரவணன் உத்தரவின் பேரில் தூத்துக்குடி உட்கோட்டத்தில் 7 இடங்களிலும், ஊரக உட்கோட்டத்தில் 7, திருச்செந்தூர் 6, ஸ்ரீவைகுண்டம் 7, மணியாச்சி 6, கோவில்பட்டி 9, விளாத்திகுளம் 9, சாத்தான்குளம் 6 இடங்கள் ஆக மொத்தம் 57 இடங்களில் வாகன தணிக்கை மேற்கொள்ளப்பட்டது. இந்த பணியில் 8 துணை போலீஸ் சூப்பிரண்டுகள், 8 இன்ஸ்பெக்டர்கள், 68 சப்-இன்ஸ்பெக்டர்கள் உள்பட 160 போலீசார் ஈடுபட்டனர்.

அப்போது, அபாயகரமாகவும், பொதுமக்களுக்கு தீங்கு விளைவிக்கும் வகையில் விதிமுறைகளை மீறி செயல்பட்டதாக தட்டப்பாறை போலீஸ் நிலையத்தில் ஒரு கனரக வாகனம் மற்றும் 5 மோட்டார் சைக்கிள் மீதும், திருச்செந்தூர் தாலுகா மற்றும் கோவில் போலீஸ் நிலையங்களில் மொத்தம் 4 இருசக்கர வாகனங்கள் மீதும், ஆத்தூர் போலீஸ் நிலையத்தில் ஒரு மோட்டார் சைக்கிள், ஓட்டப்பிடாரம் போலீஸ் நிலையத்தில் ஒரு கனரக வாகனம், 7 கார்கள் உள்பட 19 வாகனங்களின் உரிமையாளர்கள் மீது நடவடிக்கை எடுக்கப்பட்டு உள்ளன. இது தொடர்பாக 11 வழக்குகள் பதிவு செய்யப்பட்டு தீவிர விசாரணை மேற்கொள்ளப்பட்டு வருகிறது.