மின்சாரம் பாய்ந்து பெயிண்டர் பலி

அன்னவாசல்:

பெயிண்டர் பலி

அன்னவாசல் பகுதியை சேர்ந்த ஒருவரது வீட்டிற்கு பெயிண்ட் அடிப்பதற்காக கீரனூர் பகுதியை சேர்ந்த 4 பேர் நேற்று அன்னவாசல் வந்துள்ளனர். பின்னர் 4 பேரும் வீட்டின் வெளிபுறத்தில் பெயிண்ட் அடித்து கொண்டிருந்தனர்.

இதில் குளத்தூர் அருகே வாழாமங்களம் பகுதியை சேர்ந்த ராசு மகன் கார்த்திக் (வயது 26) என்பவர் பெயிண்ட் அடித்து கொண்டிருந்தார். அப்போது எதிர்பாராதவிதமாக தலைக்கு மேல் சென்ற மின் கம்பியில் கை உரசியதாக கூறப்படுகிறது. இதையடுத்து கார்த்திக் மீது மின்சாரம் பாய்ந்ததில் அவர் சம்பவ இடத்திலேயே பரிதாபமாக உயிரிழந்தார்.

வாலிபர் படுகாயம்

இதனை கண்ட அவருடன் வேலை செய்த சபரிராஜ் (28) என்பவர் கார்த்திக்கை காப்பாற்ற முற்பட்டபோது அவரும் படுகாயம் அடைந்தார். இதனையடுத்து அருகில் இருந்தவர்கள் உடனடியாக படுகாயமடைந்த சபரிராஜ் என்பவரை மீட்டு சிகிச்சைக்காக புதுக்கோட்டை அரசு மருத்துவக்கல்லூரி மருத்துவமனைக்கு அனுப்பி வைத்தனர்.

இதுகுறித்து தகவல் அறிந்த அன்னவாசல் போலீசார் சம்பவ இடத்திற்கு வந்து கார்த்திக் உடலை மீட்டு பிரேத பரிசோதனைக்காக புதுக்கோட்டை அரசு மருத்துவக்கல்லூரி மருத்துவமனைக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.