இருசக்கர வாகன டயர் வெடித்து ஒருவர் பலி

திருமங்கலம்,

மதுரை கே.புதூர் பகுதியைச் சேர்ந்தவர் முருகன்(வயது 38). இவரும் உறவினரான செந்தில்குமாரும் இருசக்கர வாகனத்தில் கடந்த 23-ந்தேதி சிவகாசியில் வெடி வாங்குவதற்காக சென்று கொண்டு இருந்தனர். கள்ளிக்குடி நான்கு வழிச்சாலையில் வந்து கொண்டிருந்தபோது இருசக்கர வாகனத்தின் டயர் வெடித்தது. இதில் இருவரும் கீழே விழுந்து காயம் அடைந்தனர். பலத்த காயம் அடைந்த முருகன் 108 ஆம்புலன்ஸ் மூலம் சிகிச்சைக்காக திருமங்கலம் அரசு மருத்துவமனையில் அனுமதிக்கப்பட்டு மேல் சிகிச்சைக்காக மதுரை ராஜாஜி மருத்துவமனைக்கு அனுப்பி வைக்கப்பட்டார். இந்நிலையில் நேற்று சிகிச்சை பலனின்றி முருகன் உயிர் இழந்தார். இச்சம்பவம் குறித்து கள்ளிக்குடி போலீசார் வழக்கு பதிவு செய்து விசாரணை மேற்கொண்டு வருகின்றனர்.