ரெயிலில் அடிபட்டு ஒருவர் பலி

கடலூர், 

கடலூர் துறைமுகத்தில் இருந்து நேற்று முன்தினம் இரவு விருத்தாசலம் நோக்கி ரெயில் ஒன்று புறப்பட்டது. அந்த ரெயில் இரவு 9 மணி அளவில் குறிஞ்சிப்பாடி-வடலூர் இடையே சென்ற போது, தண்டவாளத்தை கடக்க முயன்ற 45 வயது மதிக்கத்தக்க ஒருவர் கண்ணிமைக்கும் நேரத்தில் ரெயிலில் அடிபட்டு உயிரிழந்தார். இது குறித்த தகவலின்பேரில் கடலூர் ரெயில்வே போலீசார் விரைந்து சென்று, ரெயில் மோதி இறந்து கிடந்தவரின் உடலை கைப்பற்றி பிரேத பரிசோதனைக்காக கடலூர் அரசு ஆஸ்பத்திரிக்கு அனுப்பி வைத்தனர். தொடர்ந்து இதுகுறித்த புகாரின் பேரில் ரெயில்வே போலீசார் வழக்குப்பதிவு செய்து இறந்தவர் யார்? எந்த ஊரைச் சேர்ந்தவர்? என்பது குறித்து விசாரணை நடத்தி வருகின்றனர்.