தீபாவளி பண்டிகையையொட்டி மதுக்கடைகளை மூட வேண்டும்: சிவசேனா கட்சியினர் கோரிக்கை

தேனி மாவட்ட கலெக்டர் அலுவலகத்துக்கு சிவசேனா கட்சி மாநில செயலாளர் குருஅய்யப்பன் தலைமையில் நிர்வாகிகள் சிலர் வந்தனர். மாவட்ட கலெக்டரின் நேர்முக உதவியாளர் (பொது) அன்பழகனிடம் அவர்கள் ஒரு கோரிக்கை மனு கொடுத்தனர். அதில், "வருகிற 24-ந்தேதி தீபாவளி பண்டிகை கொண்டாடப்படுகிறது. இந்த பண்டிகை தினத்தில் மதுக்கடைகள் திறக்கப்படுவதால் வாகன விபத்துகள், குடும்ப வன்முறைகள் அதிக அளவில் நடக்கின்றன. எனவே, தீபாவளி பண்டிகை நாளிலும், அதற்கு முந்தைய நாள் மற்றும் தீபாவளிக்கு மறுநாள் ஆகிய 3 நாட்கள் விபத்துகள், வன்முறைகள் நடக்காமல் தடுக்கும் முன்னெச்சரிக்கை நடவடிக்கையாக தமிழகம் முழுவதும் மதுக்கடைகளை மூட நடவடிக்கை எடுக்க வேண்டும்" என்று கூறியிருந்தனர்.