குளத்தில் தவறி விழுந்த மூதாட்டி சாவு

திருவட்டார்:

திருவட்டாரை அடுத்த கண்ணனூர் ஆறாம் விளாகத்தை சேர்ந்தவர் நேசையன் (வயது 63), தொழிலாளி. இவருடைய மனைவி சார்லெட் (61). இவர்களுக்கு 2 மகள்களும், ஒரு மகனும் உள்ளனர். 3 பேருக்கும் திருமணமாகி விட்டது.

சார்லெட் தினமும் காலையில் வீட்டின் அருகில் உள்ள ஒரு குளத்தில் குளிப்பது வழக்கம். அதன்படி நேற்று காலை 9 மணிக்கு குளத்தில் குளிக்க படியில் இறங்கியதில் வழுக்கி தண்ணீரில் விழுந்துள்ளார். இதனால் அவர் தண்ணீரில் மூழ்கி விட்டார்.

பின்னர் அவரை மீட்டு சிகிச்சைக்காக சிலர் ஆசாரிப்பள்ளம் அரசு மருத்துவமனையில் சேர்த்தனர். பரிசோதித்த டாக்டர்கள் அவர் ஏற்கனவே இறந்து விட்டதாக கூறினர். மேலும் இந்த சம்பவம் குறித்து திருவட்டார் போலீசார் வழக்குப்பதிவு செய்து விசாரணை நடத்தி வருகின்றனர்.