திருச்சி பெண் என்ஜினீயரிடம் ரூ.8 லட்சம் மோசடி செய்த நைஜீரிய வாலிபர்

திருச்சி பெண் என்ஜினீயரிடம் ரூ.8 லட்சம் மோசடி செய்த நைஜீரிய வாலிபர் குறித்து சைபர் கிரைம் போலீசார் விசாரணை நடத்தி வருகின்றனர்.

சாப்ட்வேர் என்ஜினீயர்

திருச்சியை அடுத்த துவாக்குடி பகுதியைச் சேர்ந்த சாப்ட்வேர் என்ஜினீயரான 25 வயது பெண் ஒருவர் தில்லைநகரில் உள்ள ஒரு தனியார் நிறுவனத்தில் பணியாற்றி வந்தார். இந்த நிலையில் ஆன்லைன் திருமண தகவல் மையத்தில் மாப்பிள்ளை தேடும் முயற்சியில் ஈடுபட்டார்.

அப்போது பெங்களூரு முகவரியில் ஒரு வாலிபரை பார்த்தார். பின்னர் அந்த வாலிபரும் அந்த பெண்ணும் சாட்டிங் செய்ய தொடங்கினர். அப்போது அந்த வாலிபர் தனது சொந்த ஊர் பெங்களூரு என்றும், தற்போது லண்டனில் வசித்து வருவதாகவும் கூறினார். நான் சம்பாதித்து வைத்திருக்கும் நகை மற்றும் வெளிநாட்டு கரன்சி ஆகியவை இந்திய மதிப்பில் ரூ.2 கோடி அளவுக்கு இருக்கிறது. அதனை பார்சலில் உனது பெயருக்கு அனுப்பி வைக்கிறேன். அதனை வாங்கி வைத்துக்கொள். 2 மாதங்களில் இந்தியா திரும்புவேன். பின்னர் நாம் இருவரும் திருமணம் செய்து தமிழ்நாட்டில் வசிக்கலாம் எனக் கூறியுள்ளார்.

ரூ.8 லட்சம்

இதனை அவரும் நம்பினார். அடுத்த சில தினங்களில் டெல்லி ஏர்போர்ட்டில் இருந்து பேசுவதாக ஒருவர் அந்த பெண் செல்போனுக்கு அழைப்பு விடுத்தார். அதில் லண்டனிலிருந்து தங்களது பெயருக்கு ஒரு பார்சல் வந்துள்ளது. இதனை நீங்கள் பெற்றுக்கொள்ள வேண்டும் என்றால் இந்திய ரிசர்வ் வங்கி அனுமதி, சுங்கத்துறை அனுமதி ஆகியவை பெற வேண்டும். மேலும் வரி செலுத்த வேண்டும். வெளிநாட்டு கரன்சியை மாற்ற வேண்டும் என ஒவ்வொன்றாக சொல்லி ரூ.8 லட்சம் செலுத்த வேண்டும் எனக் கூறினார்.

லண்டன் வாலிபர் அனுப்பிய பார்சலில் ரூ.2 கோடி நகை, வெளிநாட்டு கரன்சி இருக்கும் என நம்பிய அந்த பெண் உடனடியாக அந்த நபர் கூறிய வங்கி கணக்கிற்கு ரூ.8 லட்சம் அனுப்பினார். இதனையடுத்து அனைத்து தொடர்புகளும் துண்டிக்கப்பட்டு விட்டன. நகையும் வரவில்லை. வெளிநாட்டு கரன்சியும் கிடைக்கவில்லை.

நைஜீரிய வாலிபர்

இதையடுத்து தான் ஏமாற்றப்பட்டதை உணர்ந்து கொண்ட அந்த பெண் உடனடியாக திருச்சி புறநகர் சைபர் கிரைம் போலீசில் புகார் செய்தார். இன்ஸ்பெக்டர் அன்புச்செல்வன் உடனடியாக விரைந்து விசாரணை மேற்கொண்டார். இதில் அந்த பெண் அனுப்பிய ரூ.8 லட்சம் கொல்கத்தாவில் உள்ள இந்தியன் வங்கி கணக்கிற்கு சென்றது தெரியவந்தது. உடனே அங்குள்ள வங்கி அதிகாரிகளை தொடர்பு கொண்டு கணக்கை முடக்கினர்.

பின்னர் நடத்தப்பட்ட விசாரணையில், அந்த பெண்ணிடம் மோசடி செய்த நபர் நைஜீரிய வாலிபர் என்பது தெரிய வந்தது. மேற்கு வங்காளத்தில் தங்கியிருந்து திருச்சி பெண்ணை ஏமாற்றியுள்ளார். மேலும் இந்த சம்பவம் குறித்து சைபர் கிரைம் போலீசார் வழக்குப்பதிவு செய்து விசாரணை நடத்தி வருகின்றனர்.