தஞ்சை மாவட்டத்தில் 7 மையங்களில் நீட் தேர்வு

தஞ்சை மாவட்டத்தில் 7 மையங்களில் நீட் தேர்வு இன்று(ஞாயிற்றுக்கிழமை) நடைபெறுகிறது. இதில் 5 ஆயிரத்து 440 மாணவ, மாணவிகள் கலந்து கொண்டு தேர்வு எழுத உள்ளனர்.

நீட் தேர்வு

இந்தியா முழுவதும் அரசு, தனியார் மருத்துவக்கல்லூரிகளில் எம்.பி.பி.எஸ்., பி.டி.எஸ். படிப்புகள், சித்தா, ஆயுர்வேதா, யுனானி, ஓமியோபதி படிப்புகள், கால்நடை மருத்துவப்படிப்பின் அகில இந்திய ஒதுக்கீட்டு இடங்களுக்கு தேசிய தகுதி மற்றும் நுழைவுத் தேர்வு (நீட்) மூலம் மாணவர் சேர்க்கை நடத்தப்படுகிறது. அதேபோல, ராணுவ கல்லூரிகளில் பி.எஸ்சி நர்சிங் படிப்புக்கும் நீட் தேர்வு கட்டாயமாக்கப்பட்டுள்ளது.இந்த நீட்தேர்வை இந்தியா முழுவதும் தேசிய தேர்வுகள் முகமை (என்.டி.ஏ.) ஆண்டுதோறும் நடத்திவருகிறது. அதன்படி, 2023-24-ம் கல்வி ஆண்டில் மாணவர் சேர்க்கைக்கான நீட் தேர்வு நாடு முழுவதும் இன்று (ஞாயிற்றுக்கிழமை) நடைபெறுகிறது. இந்த தேர்வு தமிழ், ஆங்கிலம், இந்தி உள்ளிட்ட 13 மொழிகளில் நடைபெறுகிறது.

7 மையங்களில்......

அதன்படி தஞ்சை மாவட்டத்தில் 7 மையங்களில் இந்த நீட் தேர்வு நடைபெறுகிறது. இந்த தேர்வு எழுத 5 ஆயிரத்து 440 மாணவ, மாணவிகள் விண்ணப்பித்துள்ளனர். தஞ்சை தாமரை பன்னாட்டு பள்ளியில் நடைபெறும் மையத்தில் 1,609 மாணவ, மாணவிகளும், சாஸ்த்ரா பல்கலைக்கழகத்தில் நடைபெறும் மையத்தில் 1,104 மாணவ, மாணவிகளும், பிளாசம் பப்ளிக் பள்ளியில் 495 மாணவ, மாணவிகளும் தேர்வு எழுத உள்ளனர்.

கும்பகோணம் தாமரை பன்னாட்டு பள்ளியில் 648 மாணவ, மாணவிகளும், அரசு என்ஜினீயரிங் கல்லூரியில் 648 மாணவ, மாணவிகளும், மகரிஷி வித்யா மந்திர் பள்ளியில் 360 மாணவ, மாணவிகளும், பட்டுக்கோட்டை பிரிலியண்ட் பள்ளி மையத்தில் 576 மாணவ, மாணவிகளும் தேர்வு எழுத உள்ளனர்.

போலீஸ் பாதுகாப்பு

நீட் தேர்வு எழுத செல்லும் மாணவ-மாணவிகள் முழுக்கை சட்டை அணியக்கூடாது, மாணவிகள் காதுகளில் தோடு, மூக்குத்தி, காதுமாட்டி அணியக்கூடாது. தலைமுடியில் ஜடை பின்னல் போடக்கூடாது. கிளிப் மாட்டக்கூடாது. மாணவர்கள் பெல்ட் அணியக்கூடாது. கைக்கெடிகாரம், கால்குலேட்டர், தொப்பி, ஹெட்போன் மற்றும் எலக்ட்ரானிக் பொருட்கள் எடுத்து செல்லக்கூடாது என்பது குறிப்பிடத்தக்கது. நீட் தேர்வு நடைபெறுவதையொட்டி பலத்த போலீஸ் பாதுகாப்பும் போடப்பட்டுள்ளது.