சத்தியமங்கலம் அருகே மரத்தில் கார் மோதி டிரைவர் பலி

சத்தியமங்கலம்

சத்தியமங்கலம் அருகே மரத்தில் கார் மோதிய விபத்தில் டிரைவர் பலியானார். விவசாயிகள் 2 பேர் படுகாயம் அடைந்தனர்.

மரத்தில் மோதியது

கர்நாடக மாநிலம் உன்சூரை சேர்ந்தவர்கள் முஜாஹித், சிக்கந்தர். விவசாயிகளான இவர்கள் மஞ்சள் விற்பனை செய்வது தொடர்பாக உன்சூரில் இருந்து ஈரோட்டுக்கு காரில் வந்தனர். காரை உன்சூர் பகுதியை சேர்ந்த டிரைவர் நாசீர் (வயது 45) என்பவர் ஓட்டி வந்தார்.

ஈரோடு மாவட்டம் சத்தியமங்கலத்தை அடுத்த குய்யனூர் பிரிவு அருகே நேற்று காலை கார் வந்தபோது எதிர்பாராதவிதமாக சாலையோர மரத்தில் மோதியது.

சாவு

இந்த விபத்தில் காரின் முன்புறம் அப்பளம் போல் நொறுங்கியது. இதனால் இடிபாடுகளுக்கு இடையே சிக்கி நாசீர் சம்பவ இடத்திலேயே பரிதாபமாக உயிரிழந்தார்.

மேலும் விபத்தில் முஜாஹித், சிக்கந்தர் ஆகியோர் படுகாயம் அடைந்தனர். உடனே அக்கம் பக்கத்தினர் விரைந்து வந்து, படுகாயம் அடைந்த 2 பேரையும் மீட்டு சிகிச்சைக்காக சத்தியமங்கலம் அரசு ஆஸ்பத்திரிக்கு அனுப்பி வைத்தனர். பின்னர் மேல் சிகிச்சைக்காக கோவையில் உள்ள தனியார் ஆஸ்பத்திரிக்கு கொண்டு செல்லப்பட்டனர்.

விபத்து குறித்த தகவல் கிடைத்ததும் சத்தியமங்கலம் போலீசார் சம்பவ இடத்துக்கு விரைந்து சென்று நாசீரின் உடலை கைப்பற்றி பிரேத பரிசோதனைக்காக சத்தியமங்கலம் அரசு ஆஸ்பத்திரிக்கு அனுப்பி வைத்தனர். இதுகுறித்து சத்தியமங்கலம் போலீசார் வழக்குப்பதிவு செய்து விசாரணை நடத்தி வருகிறார்கள்.