பவானி அருகே ஜீப் மோதி வடமாநில வாலிபர் பலி

பவானி

பவானியை அடுத்த சித்தோட்டில் உள்ள கோவை- சேலம் தேசிய நெடுஞ்சாலையில் நொச்சிபாளையம் பிரிவு பகுதியில் நேற்று 35 வயது மதிக்கத்தக்க வடமாநில வாலிபர் ஒருவர் நடந்து சென்று கொண்டிருந்தார். அப்போது அந்த வழியாக வந்த ஜீப் எதிர்பாராதவிதமாக வடமாநில வாலிபர் மீது மோதிவிட்டு நிற்காமல் சென்றுவிட்டது. இதில் அவர் படுகாயம் அடைந்து சம்பவ இடத்திலேயே பரிதாபமாக இறந்துவிட்டார்.

இதுபற்றிய தகவல் கிடைத்ததும் சித்தோடு போலீசார் சம்பவ இடத்துக்கு விரைந்து சென்று இறந்தவரின் உடலை கைப்பற்றி பிரேத பரிசோதனைக்காக ஈரோடு அரசு ஆஸ்பத்திரிக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து இறந்த வடமாநில வாலிபர் யார்? எந்த ஊரை சேர்ந்தவர்? இங்கு எந்த பகுதியில் வேலை செய்து வந்தார்? எதற்காக நொச்சிபாளையம் பிரிவு பகுதிக்கு வந்தார்? என விசாரணை நடத்தி வருகின்றனர்.