மோட்டார் சைக்கிள் திருடிய ஓட்டல் தொழிலாளி கைது

பழனி முல்லைநகரை சேர்ந்தவர் சாம்கிளாமென்ட் (வயது 26). ஓமியோபதி டாக்டர். இவர், கடந்த 18-ந்தேதி தனது மோட்டார் சைக்கிளை பழனி ஆர்.எப்.ரோட்டில் நிறுத்திவிட்டு சென்றார். சிறிது நேரம் கழித்து வந்து பார்த்தபோது மோட்டார் சைக்கிளை காணவில்லை. மர்ம நபர் திருடி சென்றுவிட்டார். இதுகுறித்து பழனி டவுன் போலீசில் புகார் செய்தார். அதன்பேரில் போலீசார் வழக்குப்பதிவு செய்து விசாரணை நடத்தினர்.

விசாரணையில், பழனியில் உள்ள ஓட்டலில் தங்கி வேலை செய்து வரும் திருச்சி மாவட்டம் மணப்பாறையை சேர்ந்த யோகராஜ் (33), சாம்கிளாமென்ட்டின் மோட்டார் சைக்கிளை திருடியது தெரியவந்தது. அதையடுத்து போலீசார் அவரை கைது செய்தனர். அவரிடம் இருந்த மோட்டார் சைக்கிள் பறிமுதல் செய்யப்பட்டது.