சாத்தான்குளம் அருகே மோட்டார் சைக்கிள் விபத்தில் வாலிபர் பலி

தட்டார்மடம்:

சாத்தான்குளம் அருகே சகோதரரின் திருமணத்தன்று மோட்டாா் சைக்கிள் விபத்தில் வாலிபர் பலியானார். மற்றொரு வாலிபர் படுகாயம் அடைந்தார்.

திருமண விழா

சாத்தான்குளம் அருகே உள்ள தெற்கு அமுதுண்ணாக் குடியைச் சேர்ந்த கோயில் பிச்சை மகன் அருண்ஜெபர்சன் (வயது 24). இவரது சகோதரருக்கு நேற்று முன்தினம் திருமணம் நடந்தது. இந்த திருமணத்திற்கு உறவினர்கள் பலர் வந்திருந்தனர்.

இந்நிலையில் நேற்று இரவு அருண் ஜெபர்சன் அவரது உறவினர் நாகர்கோவில் தேவிகூடை சேர்ந்த ராஜகோபால் மகன் பென்னி ஜோஸ் (22) ஆகிய இருவரும் மோட்டார் சைக்கிளில் சாத்தான்குளம் சென்று டீக்கடையில் டீ குடித்தனர். பின்னர் மீண்டும் அங்கிருந்து மோட்டார் சைக்கிளில் ஊருக்கு திரும்பி கொண்டிருந்தனர்.

விபத்தில் வாலிபர் பலி

அப்போது எதிர்பாராதவிதமாக மோட்டார் சைக்கிள் நிலைதடுமாறி அமுதுண்ணாக்குடி சாலையில் உள்ள ஊர் எல்லை விளம்பர பலகையின் மீது பயங்கரமாக மோதியது. இதில் மோட்டார் சைக்கிளில் இருந்து 2 பேரும் தூக்கி வீசப்பட்டனர். இதில் பலத்த காயம் அடைந்த அருண் ஜெபர்சன் சம்பவ இடத்திலேயே ரத்த வெள்ளத்தில் உயிரிழந்தார்.

மற்றொருவர் படுகாயம்

பலத்த காயங்களுடன் கிடந்த பென்னி ஜோசை அக்கம் பக்கத்தினர் மீட்டு பாளையங்கோட்டை ஐகிரவுண்டு அரசு மருத்துவமனையில் சேர்த்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. இதுகுறித்து தகவல் அறிந்த சாத்தான்குளம் போலீஸ் இன்ஸ்பெக்டர் பாஸ்கரன் சம்பவ இடத்துக்கு சென்று அருண் ஜெபர்சன் உடலை கைப்பற்றி பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தார். மேலும் இந்த விபத்து குறித்து சாத்தான்குளம் போலீசார் வழக்கு பதிவு செய்து விசாரித்து வருகின்றனர். அவரது உடலை பார்த்து குடும்பத்தினர் கதறி அழுதது பரிதாபமாக இருந்தது.

சகோதரர் திருமணத்தன்று வாலிபர் விபத்தில் இறந்த சம்பவம் அவரது குடும்பத்தினர்் மட்டுமின்றி கிராமத்திலும் மிகுந்த சோகத்தை ஏற்படுத்தியுள்ளது.