மொபட்-மோட்டார்சைக்கிள் மோதல்; விவசாயி சாவு- முதியவர் படுகாயம்

கொடுமுடி

கொடுமுடி அருகே உள்ள இச்சிப்பாளையத்தை சேர்ந்தவர் மோகனசுந்தரம் (வயது 57). விவசாயி. இவர் பாலக்காபாளையத்தில் இருந்து இச்சிப்பாளையம் நோக்கி மோட்டார்சைக்கிளில் சென்று கொண்டிருந்தார். வாய்க்கால்செட் அருகே ராமா தோட்டம் என்ற இடத்தில் சென்றபோது அந்த வழியாக கொளத்துப்பாளையத்தைச் சேர்ந்த கந்தசாமி (75) என்பவர் வந்த மொபட்டும், மோகனசுந்தரத்தின் மோட்டார்சைக்கிளும் எதிர்பாராதவிதமாக நேருக்கு நேர் மோதிக்கொண்டன.

இந்த விபத்தில் மோகனசுந்தரமும், கந்தசாமியும் தூக்கி வீசப்பட்டு படுகாயம் அடைந்தனர். இதை பார்த்த அக்கம்பக்கத்தினர் மோகனசுந்தரத்தை மீட்டு சிகிச்சைக்காக 108 ஆம்புலன்ஸ் மூலம் கொடுமுடி அரசு ஆஸ்பத்திரியில் சேர்த்தனர். பின்னர் மேல்சிகிச்சைக்காக கொடுமுடியில் உள்ள ஒரு தனியார் மருத்துவமனைக்கு கொண்டு செல்லப்பட்டார். அங்கு டாக்டர்கள் பரிசோதித்துவிட்டு மோகனசுந்தரம் ஏற்கனவே இறந்துவிட்டதாக தெரிவித்தனர். கந்தசாமி கோவையில் உள்ள ஒரு தனியார் மருத்துவமனையில் அனுமதிக்கப்பட்டு சிகிச்சை பெற்று வருகிறார்.

இதுகுறித்து கொடுமுடி போலீசார் வழக்குப்பதிவு செய்து விசாரணை நடத்தி வருகின்றனர்.