அந்தியூர் பத்ரகாளியம்மன் கோவிலில் தேரோட்டம்; ஏராளமான பக்தர்கள் வடம் பிடித்து இழுத்தனர்

அந்தியூர்

அந்தியூர் பத்ரகாளியம்மன் கோவிலில் தேரோட்டம் நடந்தது. இதில் ஏராளமான பக்தர்கள் வடம் பிடித்து தேரை இழுத்தனர்.

தேரோட்டம்

அந்தியூர் பஸ் நிலையம் அருகே மிகவும் பிரசித்தி பெற்றதும், புகழ்பெற்றதுமான அந்தியூர் பத்தரகாளியம்மன் கோவில் உள்ளது. இங்கு கடந்த 5-ந்தேதி குண்டம் இறங்கும் நிகழ்ச்சி நடைபெற்றது. முக்கிய நிகழ்வான தேரோட்டம் நேற்று மாலை 6 மணி அளவில் நடைபெற்றது. இதையொட்டி சிறப்பு அலங்காரத்தில் அம்மன் மேளதாளங்கள் முழங்க தேரில் எழுந்தருளினார். பின்னர் சிறப்பு பூஜைகள் செய்யப்பட்டது. அதைத்தொடர்ந்து அந்தியூர் தொகுதி ஏ.ஜி.வெங்கடாசலம் எம்.எல்.ஏ., தாசில்தார் தாமோதரன், போலீஸ் சப்-இன்ஸ்பெக்டர் கார்த்திக் உள்பட ஏரா ளமான பக்தர்கள் தேரை வடம் பிடித்து இழுத்தனர்.

3 நாட்கள்

மேளதாளங்களுக்கு ஏற்ப அசைந்து ஆடியபடி தேர் அரசு ஆஸ்பத்திரி அருகே நிறுத்தப்பட்டது. தொடர்ந்து இன்று (சனிக்கிழமை), நாளை (ஞாயிற்றுக்கிழமை), நாளை மறுநாள் (திங்கட்கிழமை) ஆகிய 3 நாட்களும் மாலை 5 மணி அளவில் தேர் இழுத்து செல்லப்பட்டு நிலை சேர்க்கப்படுகிறது.