நெய்வேலி அருகே ஓய்வுபெற்ற என்எல்சி தொழிலாளி வீட்டில் நகை-பணம் கொள்ளை மர்மநபர்களுக்கு போலீஸ் வலைவீச்சு

நெய்வேலி, 

நெய்வேலி அடுத்த வடக்குத்து பகுதியை சேர்ந்தவர் நவாப்கான் (வயது 60). ஓய்வுபெற்ற என்.எல்.சி. தொழிலாளி. இவர் தனது மகனின் திருமணத்தையொட்டி கடந்த 4-ந்தேதி வீட்டை பூட்டிவிட்டு குடும்பத்தினருடன் சேலம் சென்றார்.

இந்த நிலையில் நேற்று முன்தினம் நவாப்கான் வீட்டின் முன்பக்க கதவு உடைக்கப்பட்ட நிலையில் திறந்து கிடந்தது. இதை அருகில் உள்ள வீட்டை சேர்ந்தவர்கள் பார்த்து அதிர்ச்சியடைந்தனர். பின்னர் இதுபற்றி நவாப்கானுக்கு செல்போன் மூலம் தகவல் தெரிவித்தனர்.

இதையடுத்து அவர் பதறியடித்துக்கொண்டு வடக்குத்தில் உள்ள வீட்டிற்கு விரைந்து வந்து பார்த்தார். அப்போது வீட்டில் இருந்த பொருட்கள் அனைத்தும் சிதறிக்கிடந்தன.

நகை-பணம் கொள்ளை

மேலும் 2 அறைகளில் இருந்த பீரோக்கள் உடைக்கப்பட்டு இருந்தது. அதில் வைத்திருந்த 7¾ பவுன் நகைகள், ரூ.10 ஆயிரம் ரொக்கம், வீட்டில் நிறுத்தியிருந்த மோட்டார் சைக்கிள் ஆகியவற்றை காணவில்லை. அவற்றை யாரோ மர்மநபர்கள் கொள்ளையடித்து சென்றுள்ளனர்.

இதுபற்றி தகவல் அறிந்த நெய்வேலி டவுன்ஷிப் போலீசார் சம்பவ இடத்துக்கு விரைந்து வந்து கொள்ளை நடந்த வீட்டை பார்வையிட்டு அக்கம்பக்கத்தினரிடம் விசாரணை நடத்தினர். அதில் வீட்டில் ஆட்கள் இல்லாததை நோட்டமிட்ட மர்மநபர்கள் வீட்டின் முன்பக்க கதவை உடைத்து நகை-பணத்தை கொள்ளையடித்து சென்றிருப்பது தெரியவந்தது. மேலும் தடயவியல் நிபுணர்கள் வரவழைக்கப்பட்டு வீட்டில் பதிவாகியிருந்த தடயங்களை சேகரித்து சென்றனர்.

மேலும் இதுகுறித்த புகாரின்பேரில் போலீசார் வழக்குப்பதிவு செய்து நகை-பணத்தை கொள்ளையடித்து சென்ற மர்மநபர்களை வலைவீசி தேடி வருகின்றனர்.