கருங்கல்பாளையம் சந்தைக்கு மாடுகள் வரத்து குறைந்தது

ஈரோடு கருங்கல்பாளையத்தில் வாரந்தோறும் புதன் மற்றும் வியாழக்கிழமைகளில் மாட்டுச்சந்தை நடந்து வருகிறது. அதன்படி நேற்று முன்தினம் நடந்த சந்தைக்கு 50-க்கும் மேற்பட்ட கன்றுக்குட்டிகள் விற்பனைக்கு கொண்டு வரப்பட்டது. இவைகள் ரூ.6 ஆயிரம் முதல் ரூ.18 ஆயிரம் வரை விற்பனை ஆனது. இந்த நிலையில் நேற்று கூடிய வழக்கமான சந்தைக்கு ஈரோடு மாவட்டத்தின் பல்வேறு பகுதிகளில் இருந்தும், திண்டுக்கல், தேனி, கரூர், திருச்சி உள்பட பிற மாவட்டங்களில் இருந்தும் விவசாயிகள் தங்களது மாடுகளை விற்பனைக்காக கொண்டு வந்தனர்.

350 பசுமாடுகள், 100 எருமை மாடுகள் என மொத்தம் 450 மாடுகள் விற்பனைக்காக கொண்டு வரப்பட்டன. இதில் பசு மாடு ஒன்று ரூ.30 ஆயிரம் முதல் ரூ.70 ஆயிரம் வரையிலும், எருமை மாடு ரூ.30 ஆயிரம் முதல் ரூ.60 ஆயிரம் வரையிலும் விலை போனது.

தமிழ்நாடு மட்டுமின்றி பல்வேறு வெளிமாநிலங்களை சேர்ந்த வியாபாரிகள் வந்து, விவசாயிகளிடம் நேரடியாக விலை பேசி மாடுகளை வாங்கி சரக்கு வாகனங்களில் ஏற்றி சென்றார்கள். பொங்கல் பண்டிகை காரணமாக இந்த வாரம் மாடுகள் வரத்து குறைந்துள்ளதாகவும், சந்தைக்கு கொண்டு வரப்பட்டதில் 90 சதவீத மாடுகள் விற்பனை ஆனதாகவும் சந்தை நிர்வாகிகள் தெரிவித்தனர்.