தூத்துக்குடியில் மாநில அளவிலான ஸ்கேட்டிங் போட்டி தொடக்கம்

தூத்துக்குடியில் மாநில அளவிலான ஸ்கேட்டிங் போட்டியை மாவட்ட போலீஸ் சூப்பிரண்டு பாலாஜி சாரவணன் தொடங்கி வைத்தார்.

ஸ்கேட்டிங் போட்டி

தூத்துக்குடி ஊரக ஸ்கேட்டிங் விளையாட்டு சங்கம் சார்பில் பெண் குழந்தைகள் பாதுகாப்பு குறித்து விழிப்புணர்வு ஏற்படுத்தும் வகையில் தூத்துக்குடி முத்துநகர் கடற்கரையில் மாநில அளவிலான ரோலர் ஸ்கேட்டிங் விளையாட்டு போட்டி நடந்தது. இந்த போட்டியில் தேனி, திண்டுக்கல், மதுரை, கோவை, திருப்பூர், தென்காசி, விருதுநகர், தூத்துக்குடி, சிவகாசி ஆகிய மாவட்டங்களில் இருந்து 350 பள்ளி மாணவ மாணவிகள் கலந்து கொண்டனர். இந்த போட்டியை மாவட்ட போலீஸ் சூப்பிரண்டு பாலாஜி சரவணன் தொடங்கி வைத்து பேசினார்.

சாதனையாளராக..

அப்போது, தற்போது உள்ள சூழ்நிலையில் செல்போன் என்பது அவசியமான ஒன்றாக மாறி உள்ளது. செல்போன்களை குழந்தைகள் பயன்படுத்தும்போது பெற்றோர்களின் கண்காணிப்பு மிகவும் முக்கியமானதாகும். நீங்கள் செல்போன்களை தேவைக்கு மட்டுமே பயன்படுத்தி கொள்ள வேண்டும். செல்போன்களில் நேரத்தை செலவிடுவதை முற்றிலும் தவிர்த்து விளையாட்டுகளிலும் கவனம் செலுத்த வேண்டும். பிரச்சினைகளுக்கு தீர்வு தற்கொலை முடிவு இல்லை. பிரச்சினைகளை கண்டு பயப்படாமல் அதற்கான தீர்வுகளை மன தைரியத்தோடு அணுக பழகிக் கொள்ள வேண்டும். முயன்றால் முடியாதது எதுவும் இல்லை. மேலும் விளையாட்டுகள் நமது மன உளைச்சலை தீர்த்து நம்மை புத்துணர்ச்சியோடு வைத்திருக்கும். நீங்கள் நல்ல எண்ணங்களை வளர்த்து கொண்டு மற்றவர்களுக்கு முடிந்த அளவு நன்மைகளை செய்து உங்கள் வாழ்க்கையை மகிழ்ச்சியாக வாழுங்கள். மனச்சோர்வு இல்லாமல் இருந்தால் நீங்கள் வாழ்க்கையில் சாதனையாளர்களாக திகழலாம். மாணவ, மாணவிகள் கல்வியோடு சேர்ந்து விளையாட்டுகளிலும் பங்கேற்று பல வெற்றி பெற்று சாதனையாளர்களாக வரவேண்டும் என்று கூறினார். நிகழ்ச்சியில் பள்ளி மாணவ, மாணவிகள், பெற்றோர் கலந்து கொண்டனர்.