தூத்துக்குடியில் மூதாட்டி வீட்டைஉடைத்து நகை, பணம் திருட்டு

தூத்துக்குடியில் மூதாட்டி வீட்டின் பூட்டை உடைத்து நகை, பணத்தை திருடிச்சென்ற மர்ம நபர்களை போலீசார் தேடி வருகின்றனர்.

மூதாட்டி

தூத்துக்குடி அண்ணா நகர் 8-வது தெருவை சேர்ந்தவர் கட்டித்தங்கம் (வயது 77). இவருக்கு 3 மகன்கள் உள்ளனர். அனைவருக்கும் திருமணமாகி மனைவி, குழந்தைகளுடன் வெளியூரில் வசித்து வருகின்றனர்.

கணவர் இறந்து விட்டதால் கட்டித்தங்கம் மட்டும் வீட்டில் தனியாக வசித்து வருகிறார். கடந்த சில நாட்களுக்கு முன்பு அவருக்கு உடல்நலக்குறைவு ஏற்பட்டதால், வீட்டை பூட்டிவிட்டு தூத்துக்குடி அரசு மருத்துவமனையில் தங்கி சிகிச்சை பெற்று வருகிறார்.

நகைகள், பணம் திருட்டு

இந்நிலையில் நேற்று காலையில் அவரது வீட்டின் முன்பக்க கதவின் பூட்டு உடைக்கப்பட்டு கிடந்தது. இதனை பார்த்து அதிர்ச்சியடைந்த பக்கத்து வீட்டினர் உடனடியாக தென்பாகம் போலீசாருக்கு தகவல் தெரிவித்தனர். சம்பவ இடத்திற்கு போலீசார் சென்று விசாரணை நடத்தினர்.

வீட்டிற்குள் சென்று சோதனை நடத்தியபோது, பீரோவும் உடைக்கப்பட்டு இருந்தது. அதில் இருந்த 2½ பவுன் நகைகள் மற்றும் ரூ.15 ஆயிரம் பணம் திருடப்பட்டு இருந்தது தெரிய வந்தது. கட்டித்தங்கம் மருத்துவமனையில் தங்கியிருப்பதை அறிந்த மர்ம நபர்கள் வீட்டை உடைத்து உள்ளே புகுந்து நகைகள், பணத்தை திருடி சென்றது தெரிய வந்துள்ளது.

மர்ம நபர்களுக்கு வலைவீச்சு

இது குறித்து கட்டித்தங்கம் கொடுத்த புகாரின் பேரில் தென்பாகம் போலீசார் வழக்குப்பதிவு செய்து வீடுபுகுந்து நகைகள், பணத்தை திருடி சென்ற மர்ம நபர்களை தேடிவருகின்றனர்.