பிள்ளையார்நத்தத்தில்விவசாயிகள் பொன்னேர் திருவிழா

கோவில்பட்டி:

கோவில்பட்டி அருகேயுள்ள பிள்ளையார்நத்தத்தில் விவசாயிகளின் பொன்னேர் திருவிழா நடைபெற்றது. இதில் பூமி மாதாவுக்கு நடைபெற்ற சிறப்பு பூஜையில் ஏராளமான விவசாயிகள் கலந்து கொண்டு வழிபாடு நடத்தினர்.

பொன்னேர் திருவிழா

கோவில்பட்டி அருகே பிள்ளையார்நத்தம் கிராமத்தில் பொன்னேர் திருவிழா விவசாய சங்க கொடி ஏற்றத்துடன் தொடங்கியது. அத்துடன் அனைத்து பூஜை பொருள்களுடன் பெருமாள் கோவிலுக்கு சென்று வழிபாடு நடத்திவிட்டு, விவசாயி ஒருவரின் நிலத்தில் ஏராளமான டிராக்டர்களை நிறுத்தி பூமி மாதாவுக்கு பூஜைக்கான ஏற்பாடு செய்யப்பட்டது.

அங்கு சிறு அளவில் பசு சாணம் கொண்டு, பிள்ளையாரை உருவாக்கி பூஜை செய்து பச்சரிசி, வெல்லம், கம்பு அரிசி, நவ தானியங்கள் படைக்கப்பட்டது. தொடர்ந்து பூமிமாதாவுக்கு சிறப்பு பூஜை நடந்தது. இப்பூஜை முடிந்தவுடன் நவ தானியங்கள் நிலத்தில் விதைக்கப்பட்டது.

நல்ல மகசூல் வேண்டி...

தொடர்ந்து நிலங்களில் இருந்த களைகள் அகற்றப்பட்டன. பின்னர், அனைத்து விவசாயிகளும் நல்ல மழை வேண்டியும், நல்ல மகசூல், பால் வளம் வேண்டியும் அவரவர் நிலங்களில் டிராக்டர் மூலம் உழவு செய்தனர். பச்ச அரிசி, வெல்லம், பாக்கு, வெற்றிலை, கம்பு அரிசி நனைய விட்டு தயார் செய்த பிரசாதம் அனைவருக்கும் வழங்கப்பட்டது. அத்துடன் பானக்கரம், நீர் மோரும் விவசாயிகளுக்கு வழங்கப்பட்டது.

உழவை முடித்து கொண்டு ஊருக்குள் வந்த விவசாயிகள் மீது முறை பெண்கள் மஞ்சள் தண்ணீர் ஊற்றி வரவேற்றனர்.

இந்த நிகழ்ச்சியில் தேசிய விவசாயிகள் சங்க மாநில தலைவர் ரெங்கநாயகலு உள்ளிட்ட சங்க நிர்வாகிகளும் கலந்து கொண்டனர். மேலும் இந்த பொன்னேர் நிகழ்ச்சியில் 60 டிராக்டர்கள் மூலம் உழுவு செய்யப்பட்டது குறிப்பிடத்தக்கது.