வெவ்வேறு விபத்துகளில்விவசாயி உள்பட 2 பேர் பலி

விவசாயி சாவு

ஆண்டிப்பட்டி அருகே உள்ள எரதிமக்காள்பட்டி கிராமத்தை சேர்ந்தவர் கண்ணன் (வயது 45). விவசாயி. இவருக்கு ஜி.உசிலம்பட்டி அருகே தோட்டம் உள்ளது. நேற்று முன்தினம் கண்ணன் மோட்டார்சைக்கிளில் அவரது தோட்டத்திற்கு சென்று கொண்டிருந்தார். வேல்சாமிபுரம் பிரிவு அருகே சாலை வளைவில் வந்தபோது திடீரென மோட்டார்சைக்கிள் கட்டுப்பாட்டை இழந்து தாறுமாறாக ஓடியது.

அப்போது மோட்டார்சைக்கிளில் இருந்து கீழே விழுந்த கண்ணன் படுகாயம் அடைந்தார். அக்கம்பக்கத்தினர் அவரை மீட்டு சிகிச்சைக்காக தேனி அரசு மருத்துவ கல்லூரி மருத்துவமனைக்கு அனுப்பி வைத்தனர். அங்கு பரிசோதனை செய்த டாக்டர்கள் அவர் ஏற்கனவே இறந்து விட்டதாக தெரிவித்தனர். இதுகுறித்து கண்டமனூர் போலீசார் வழக்குப்பதிவு செய்து விசாரணை நடத்தி வருகின்றனர்.

மற்றொரு விபத்து

தேனி அருகே உள்ள உப்புக்கோட்டையை சேர்ந்தவர் காமேஸ்வரன் (31). இவர், பெரியகுளம் அருகே உள்ள தேவதானப்பட்டி காமாட்சி அம்மன் கோவிலில் பூசாரியாக இருந்து வந்தார். நேற்று முன்தினம் இவர், உப்புக்கோட்டையில் இருந்து மோட்டார்சைக்கிளில் தேவதானப்பட்டிக்கு சென்று கொண்டிருந்தார். திண்டுக்கல் பைபாஸ் சாலையில் மீனாட்சிபுரம் விலக்கு அருகே வந்தபோது, பின்னால் வந்த அரசு பஸ் இவரது மோட்டார்சைக்கிள் மீது மோதியது.

இதில் தூக்கி வீசப்பட்ட அவர் சம்பவ இடத்திலேயே பரிதாபமாக இறந்தார். தகவல் அறிந்த தென்கரை போலீசார் சம்பவ இடத்திற்கு விரைந்தனர். பின்னர் காமேஸ்வரன் உடலை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். இதுகுறித்து போலீசார் அரசு பஸ் டிரைவரான ஜெயக்குமார் (52) என்பவர் மீது வழக்குப்பதிவு செய்து விசாரணை நடத்தி வருகின்றனர்.