வெவ்வேறு விபத்துகளில்வாகனம் மோதி பெயிண்டர் உள்பட 2 பேர் பலி

பெயிண்டர் பலி

கீரனூர் அருகே உள்ள புளியம்பட்டி இலங்கை அகதிகள் முகாமை சேர்ந்த சசிக்குமார் மகன் சதீஷ் (வயது 18). பெயிண்டர். நேற்று முன்தினம் மாலை இவர், புளியம்பட்டியில் இருந்து மோட்டார்சைக்கிளில் பழனிக்கு வந்து கொண்டிருந்தார். மொல்லம்பட்டி பிரிவு அருகே சென்றபோது அந்த வழியாக வந்த வாகனம் இவரது மோட்டார்சைக்கிள் மீது மோதிவிட்டு நிற்காமல் சென்றது.

இதில் படுகாயம் அடைந்த சதீசை அக்கம்பக்கத்தினர் மீ்ட்டு சிகிச்சைக்காக பழனி அரசு மருத்துவமனையில் சேர்த்தனர். பின்னர் மேல் சிகிச்சைக்காக திண்டுக்கல் அரசு மருத்துவமனைக்கு கொண்டு செல்லப்பட்டார். ஆனால் செல்லும் வழியிலேயே அவர் பரிதாபமாக இறந்தார். இந்த விபத்து குறித்து கீரனூர் போலீசார் வழக்குப்பதிவு செய்து விசாரணை நடத்தி வருகின்றனர்.

போலீசார் விசாரணை

திண்டுக்கல் அருகே பழைய வக்கம்பட்டி காளியம்மன் கோவில் தெருவை சேர்ந்தவர் பழனிச்சாமி (70). இவர் ஆரிய நல்லூர் பிரிவு அருகே உள்ள தனியார் நிறுவனத்தில் காவலாளியாக வேலை பார்த்து வந்தார். நேற்று முன்தினம் இரவு இவர், திண்டுக்கல்-செம்பட்டி சாலையில் ஆரியநல்லூர் பிரிவு அருகே நடந்து சென்று கொண்டிருந்தார். அப்போது அந்த வழியாக வந்த வாகனம் அவர் மீது மோதியது.

இதில் படுகாயமடைந்த அவரை அக்கம்பக்கத்தினர் மீட்டு சிகிச்சைக்காக திண்டுக்கல் அரசு மருத்துவமனைக்கு கொண்டு வந்தனர். அங்கு பரிசோதனை செய்த டாக்டர்கள், அவர் ஏற்கனவே இறந்து விட்டதாக தெரிவித்தனர். இதுகுறித்து திண்டுக்கல் தாலுகா போலீஸ் சப்-இன்ஸ்பெக்டர் ஜெயகணேஷ் வழக்குப்பதிவு செய்து விசாரணை நடத்தி வருகிறார்.