பெருந்துறை அருகே நடந்த விபத்தில் கார் மெக்கானிக் பலி

பெருந்துறை

பெருந்துறை அருகே நடந்த விபத்தில் கார் மெக்கானிக் பலியானார்.

கார் மெக்கானிக்

பெருந்துறை-சென்னிமலை ரோட்டில் உள்ள அரசன்குட்டையை சேர்ந்தவர் தங்கராஜ். இவருடைய மகன் செந்தில்குமார் (வயது 39). இவர் பெருந்துறை மாரியம்மன் கோவில் அருகே கார்களை பழுது பார்க்கும் ஒர்க் ஷாப் வைத்து நடத்தி வந்தார். நேற்று முன்தினம் இரவு செந்தில்குமார் ஒர்க் ஷாப்பில் வேலைகளை முடித்துவிட்டு மோட்டார் சைக்கிளில் இரவு 11.30 மணியளவில் வீட்டிற்கு வந்து கொண்டிருந்தார்.

வேட்டுவபாளையம் பிரிவு அருகே அவர் சென்றபோது அவருக்கு முன்னால் சென்று கொண்டிருந்த லாரி ஒன்று, எதிர்பாராத விதமாக திடீரென நின்று விட்டது. இதை சற்றும் எதிர்பார்க்காத செந்தில்குமார் லாரியின் பின்பக்கத்தில் மோதிவிட்டார்.

இறந்தார்

இந்த விபத்தில் செந்தில்குமார் தலையில் படுகாயமடைந்து சம்பவ இடத்திலேயே ரத்த வெள்ளத்தில் இறந்து விட்டார்.

இதுபற்றி தகவல் அறிந்த பெருந்துறை போலீசார் சம்பவ இடத்துக்கு சென்று செந்தில்குமாரின் உடலை பிரேத பரிசோதனைக்காக பெருந்துறை அரசு மருத்துவமனைக்கு அனுப்பி வைத்தார்கள். மேலும் வழக்குப்பதிவு செய்து விசாரணை நடத்தி வருகிறார்கள்.

விபத்தில் இறந்த செந்தில்குமாருக்கு, சுசீலா (34) என்ற மனைவியும், ஹரீஸ் (12) என்கிற மகனும், அனுஹாசினி (6) என்கிற மகளும் உள்ளனர்.