போட்டி தேர்வுகளுக்கான இலவச பயிற்சி வகுப்பு தொடக்கம்

பெரம்பலூர் மாவட்ட வேலை வாய்ப்பு பயிற்சி துறையின் சார்பில், நான் முதல்வன் திட்டத்தின் ஒரு பகுதியாக இளைஞர்களுக்கு போட்டி தேர்வுகளை எதிர்கொள்ளும் வகையிலான இலவச பயிற்சி வகுப்பு கலெக்டர் அலுவலக கூட்ட அரங்கில் நேற்று முதல் நடந்தது. பயிற்சி வகுப்பினை கலெக்டர் கற்பகம் தொடங்கி வைத்து பேசுகையில், இந்த பயிற்சி வகுப்பானது தினமும் காலை 10 மணி முதல் மாலை 5 மணி வரை இதே கூட்ட அரங்கில் நடைபெறும். திறன் மிக்க பயிற்றுனர்கள் மூலம் 3 மாதங்களுக்கு வகுப்புகள் நடத்தப்படவுள்ளது. வங்கி தேர்வுகள், தமிழ்நாடு அரசுப்பணியாளர் தேர்வு ஆணையம், ரெயில்வே துறை வேலைவாய்ப்புகள் உள்ளிட்ட அரசுத் துறை சார்ந்த பல்வேறு பணிகளுக்கான போட்டி தேர்வுகளை எதிர்கொள்ளும் வகையில் உங்களுக்கு இந்த பயிற்சி வகுப்புகள் நடத்தப்படும். இந்த வாய்ப்பினை முறையாக பயன்படுத்திக் கொண்டு அனைவரும் அரசுப் பணிகளை பெற்று வாழ்வில் சிறந்து விளங்கிட வேண்டும், என்றார். பயிற்சி வகுப்பில் கலந்து கொண்ட இளைஞர்களுக்கு பயிற்சிக்கான கையேடுகளை கலெக்டர் வழங்கினார். இதில் வேலை வாய்ப்பு பயிற்சி துறையின் திருச்சி மண்டல இணை இயக்குனர் சந்திரன், மாவட்ட வேலைவாய்ப்பு அலுவலர் ராதாகிருஷ்ணன் உள்ளிட்ட பலர் கலந்து கொண்டனர்.