வாகனம் மோதி விவசாயி பலி

திருவண்ணாமலை வி.நம்மியந்தல் பகுதியை சேர்ந்தவர் சம்பத் (வயது 29), விவசாயி. இவர் திருவண்ணாமலை அண்ணா நுழைவாயிலில் இருந்து அவலூர்பேட்டை சாலைக்கு செல்லும் வழியில் உள்ள சுடுகாடு அருகே மோட்டார் சைக்கிளில் சென்றார். அப்போது அடையாளம் தெரியாத வாகனம் அவர் மீது மோதியது. இதில் தவறி கீழே விழுந்த அவர் மீது அந்த வாகனம் ஏறியதில் தலை நசுங்கி சம்பவ இடத்திலேயே உயிரிழந்தார்.

இதுகுறித்து தகவல் அறிந்த திருவண்ணாமலை கிழக்கு போலீசார் சம்பவ இடத்திற்கு விரைந்து வந்து உடலை மீட்டு பிரேத பரிசோதனைக்காக திருவண்ணாமலை அரசு மருத்துவமனைக்கு அனுப்பி வைத்தனர். மேலும் இந்த சம்பவம் குறித்து போலீசார் வழக்குப்பதிவு செய்து விசாரணை நடத்தி வருகின்றனர்.