தண்ணீர் பிடிப்பதில் தகராறு; 5 பேர் மீது வழக்கு

கங்கைகொண்டான்:

நெல்லை அருகே கங்கைகொண்டான் பழைய பைபாஸ் ரோடு பகுதியை சேர்ந்தவர் சங்கரன் மகன் சதீஷ்குமார் (வயது 42). இவரின் மனைவி பிரேமா. இவர்களுக்கும், அதே பகுதியை சேர்ந்த பெருமாள், அவரது மனைவி முருகம்மாள், மகன் சின்னதுரை (33) ஆகியோருக்கும் அங்குள்ள குடிநீர் குழாயில் தண்ணீர் பிடிப்பதில் தகராறு ஏற்பட்டு முன்விரோதம் இருந்தது.

இந்த நிலையில் சம்பவத்தன்று பிரேமா தண்ணீர் பிடித்து கொண்டு இருந்த போது மீண்டும் அவர்களுக்குள் தகராறு ஏற்பட்டு ஒருவரை ஒருவர் தாக்கி கொண்டனர். இந்த சம்பவம் குறித்து கங்கைகொண்டான் போலீஸ் நிலையத்தில் இருதரப்பினரும் தனித்தனியாக புகார் கொடுத்தனர். அதன்பேரில் போலீசார் சதீஷ்குமார், பிரேமா, பெருமாள், முருகம்மாள், சின்னதுரை ஆகியோர் மீது வழக்குப்பதிவு செய்தனர். இதில் சின்னதுரையை போலீசார் கைது செய்தனர்.