பெண் சப்-இன்ஸ்பெக்டருக்கு கொலை மிரட்டல்-வாலிபர் கைது

சங்கரன்கோவில்:

தென்காசி மாவட்டம் சங்கரன்கோவில் கக்கன் நகர் 3-வது தெருவை சேர்ந்தவர் கணேசன் மகன் வேலுச்சாமி (வயது 23). இவருடைய மனைவி துரைச்சி.

வேலுச்சாமி அடிக்கடி குடித்துவிட்டு வீட்டில் தகராறு செய்து வந்ததாக கூறப்படுகிறது. இந்நிலையில் கடந்த சில நாட்களுக்கு முன்பு வேலுச்சாமி மீது சங்கரன்கோவில் டவுன் போலீஸ் நிலையத்தில் அளித்த புகாரின் பேரில் போலீசார் இருவரையும் சமாதானப்படுத்தி, இனிமேல் பிரச்சினை வரக்கூடாது என கூறி அனுப்பி வைத்ததாக தெரிகிறது.

இந்தநிலையில் சம்பவத்தன்று வேலுச்சாமி டவுன் போலீஸ் நிலையத்திற்கு சென்றார். அப்போது அங்கு பணியில் இருந்த சப்-இன்ஸ்பெக்டர் உமாவிடம், நீங்கள் சொல்லி நான் கேட்க வேண்டிய அவசியம் இல்லை எனக்கூறி வாக்குவாதத்தில் ஈடுபட்டார். அவரை அசிங்கமாக பேசி, கொலை மிரட்டல் விடுத்து, பணி செய்ய விடாமல் தடுத்துள்ளார்.

இதுகுறித்து சப்-இன்ஸ்பெக்டர் உமா அளித்த புகாரின் பேரில் வழக்குப் பதிவு செய்த சங்கரன்கோவில் டவுன் போலீசார், வேலுச்சாமியை கைது செய்தனர்.