ஈரோட்டில் அதிக மது குடித்தவர் சாவு

ஈரோடு

ஈரோடு கிருஷ்ணம்பாளையம் ரோடு ஜெயகோபால் வீதியில் உள்ள டாஸ்மாக் கடைக்கு அருகில் நேற்று முன்தினம் மாலையில் ஒருவர் மயங்கி கிடந்தார். அவரை அங்கிருந்தவர்கள் மீட்டு சிகிச்சைக்காக ஈரோடு அரசு ஆஸ்பத்திரிக்கு கொண்டு சென்றனர். அங்கு பரிசோதித்த டாக்டர்கள் ஏற்கனவே அவர் இறந்துவிட்டதாக தெரிவித்தனர்.

இதுகுறித்து கருங்கல்பாளையம் போலீசார் விசாரணை நடத்தினார்கள். விசாரணையில் இறந்தவர் ஈரோடு கருங்கல்பாளையம் கமலாநகரை சேர்ந்த மூர்த்தி (வயது 38) என்பதும், அதிக மது குடித்ததால் அவர் மயங்கி விழுந்து இறந்ததும் தெரியவந்தது. இதுதொடர்பாக போலீசார் வழக்குப்பதிவு செய்து தொடர்ந்து விசாரணை நடத்தி வருகிறார்கள்.