மாடியில் இருந்து தவறி விழுந்த டிரைவர் சாவு

தேவகோட்டை

ராமநாதபுரம் மாவட்டம் திருவாடானை தாலுகா முகிழ்த்தகம் கிராமத்தைச் சேர்ந்தவர் மணிமுத்து (வயது 45). லாரி டிரைவர். இவர் தேவகோட்டை அருகே உள்ள தளக்காவயல் கிராமத்தைச் சேர்ந்த அமுதா(32) என்பவரை திருமணம் செய்துள்ளார். இவர் தளக்காவயல் கிராமத்தில் புதிய வீடு கட்டி வருகிறார். இவர்களுக்கு யோகேஸ்வரி (13) ,புவனேஸ்வரி (12) என 2 மகள்கள் உள்ளனர். நேற்று இரவு மணிமுத்து புதிதாக கட்டப்பட்டு வரும் வீட்டு மாடியில் நின்று கொண்டிருந்தபோது, எதிர்பாராதவிதமாக நிலை தடுமாறி கீழே விழுந்தார். இதில் அவரது தலையில் பலத்த காயம் ஏற்பட்டது. மணிமுத்துவின் அலறல் சத்தம் கேட்டு அருகில் உள்ளவர்கள் அவரை மீட்டு தேவகோட்டை அரசு மருத்துவமனைக்கு கொண்டு சென்றனர். அங்கு அவருக்கு தீவிர சிகிச்சை அளிக்கப்பட்டது. இருப்பினும் சிகிச்சை பலனின்றி மணிமுத்து பரிதாபமாக உயிரிழந்தார். இச்சம்பவம் குறித்து தேவகோட்டை தாலுகா போலீசார் வழக்கு பதிவு செய்து விசாரணை நடத்தி வருகின்றனர்.