மோட்டார் சைக்கிள் மீது கார் மோதல்; பள்ளி மாணவன் சாவு

வேப்பனப்பள்ளி:

வேப்பனப்பள்ளி அருகே மோட்டார் சைக்கிள் மீது கார் மோதி பள்ளி மாணவன் பரிதாபமாக இறந்தான்.

கார் மோதியது

கிருஷ்ணகிரி மாவட்டம் வேப்பனப்பள்ளி அருகே உள்ள தோட்டக்கணவாய் கிராமத்தை சேர்ந்தவர் சுப்பிரமணி. விவசாயி. இவரது மகன் கணேஷ் (வயது 12). இவன் தனியார் பள்ளி ஒன்றில் 7-ம் வகுப்பு படித்து வந்தான். நேற்று சுப்பிரமணி தனது மகன் கணேசுடன் மோட்டார் சைக்கிளில் சூளகிரியில் இருந்து வேப்பனப்பள்ளி நோக்கி சென்று கொண்டு இருந்தார்.

அப்போது எதிரே நாடுவனப்பள்ளி கிராமத்தை சேர்ந்த மஞ்சுநாத் (36) என்பவர் காரில் வேப்பனப்பள்ளியில் இருந்து ஊருக்கு வந்து கொண்டு இருந்தார். அங்குள்ள வளைவில் சென்றபோது கார், மோட்டார் சைக்கிள் மீது மோதியது. இந்த விபத்தில் தந்தை, மகன் 2 பேரும் தூக்கி வீசப்பட்டனர். அப்போது கார் மாணவன் மீது ஏறியது. இதில் அவன் படுகாயம் அடைந்தான். சுப்பிரமணி லேசான காயம் அடைந்தார்.

மாணவன் சாவு

இதையடுத்து மஞ்சுநாத், படுகாயம் அடைந்த மாணவனை தனது காரில் வேப்பனப்பள்ளி அரசு மருத்துவமனைக்கு சிகிச்சைக்காக கொண்டு சென்றார். அங்கு டாக்டர்கள் பரிசோதித்தபோது அவன் ஏற்கனவே இறந்து விட்டது தெரியவந்தது. இதுகுறித்து வேப்பனப்பள்ளி போலீஸ் நிலையத்திற்கு தகவல் தெரிவிக்கப்பட்டது.

அதன்பேரில் போலீசார் விரைந்து ெசன்று மாணவனின் உடலை கைப்பற்றி பிரேத பரிசோதனைக்காக கிருஷ்ணகிரி அரசு ஆஸ்பத்திரிக்கு அனுப்பி வைத்தனர். இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகின்றனர்.