மோட்டார் சைக்கிள் மோதி வாலிபர் சாவு

பாப்பிரெட்டிப்பட்டி:

பாப்பிரெட்டிப்பட்டி அருகே உள்ள இருளப்பட்டி பீரங்கி நகரை சேர்ந்தவர் கோபி (வயது 28). அதேபகுதியை சேர்ந்தவர் அய்யனார் (26). சம்பவத்தன்று இவர்கள் 2 பேரும் மோட்டார் சைக்கிளில் எச்.புதுப்பட்டிக்கு சென்று விட்டு மீண்டும் ஊருக்கு வந்து கொண்டிருந்தனர். சேலம்-அரூர் ரோட்டில் பீரங்கி நகரில் சாலையை கடந்தபோது தடுப்பு சுவரில் மோட்டார் சைக்கிள் மோதியது. இந்த விபத்தில் அவர்கள் 2 பேரும் படுகாயம் அடைந்தனர். அங்கிருந்தவர்கள் அவர்களை மீட்டு அரூர் அரசு மருத்துவமனையில் சேர்த்தனர். பின்னர் மேல் சிகிச்சைக்காக தர்மபுரி அரசு மருத்துவமனையில் அவர்கள் சேர்க்கப்பட்டு சிகிச்சை பெற்று வந்தனர். அங்கு சிகிச்சை பலனின்றி அய்யனார் நேற்று உயிரிழந்தார். கோபிக்கு தொடர்ந்து சிகிச்சை அளிக்கப்பட்டு வருகிறது. இந்த விபத்து குறித்து ஏ.பள்ளிபட்டி போலீசார் வழக்குப்பதிவு செய்து விசாரணை நடத்தி வருகின்றனர்.