ஆடுகளுக்கு தழை பறித்தபோது மரத்தில் இருந்து தவறி விழுந்து விவசாயி சாவு

தேன்கனிக்கோட்டை:

அஞ்செட்டி அருகே ஆடுகளுக்கு தழை பறித்தபோது மரத்தில் இருந்து தவறி விழுந்து விவசாயி பலியானார்.

விவசாயி

தேன்கனிக்கோட்டையை அடுத்த அஞ்செட்டி அருகே உள்ள மிட்டாதாரன் கொட்டாய் மலை கிராமத்தை சேர்ந்தவர் சின்னவன் (வயது 57). விவசாயி. இவருடைய மனைவி தெய்வானை. சம்பவத்தன்று சின்னவன் தனது நிலத்தில் ஆடுகளை மேய்த்து கொண்டிருந்தார்.

அப்போது ஆடுகளுக்கு தழை வெட்டுவதற்காக அங்கிருந்த வேப்ப மரத்தில் ஏறினார். அவர் மரத்தில் தழைகளை வெட்டி கொண்டிருந்தார். அப்போது திடீரென அவர் மரத்தில் இருந்து தவறி விழுந்தார். இதில் சின்னவன் படுகாயம் அடைந்தார்.

பலி

அவரை அந்த வழியாக சென்றவர்கள் மீட்டு சிகிச்சைக்காக தேன்கனிக்கோட்டை அரசு ஆஸ்பத்திரிக்கு அனுப்பி வைத்தனர். அங்கிருந்து அவர் மேல் சிகிச்சைக்காக சேலம் அரசு ஆஸ்பத்திரியில் அனுமதிக்கப்பட்டார். அங்கு தீவிர சிகிச்சை அளித்தும் பலனின்றி நேற்று முன்தினம் பலியானார்.

அஞ்செட்டி போலீசார் அவருடைய உடலை மீட்டு பிரேத பரிசோதனைக்காக அனுப்பி வைத்தனர். மேலும் இந்த சம்பவம் குறித்து வழக்குப்பதிவு செய்து விசாரணை நடத்தி வருகின்றனர். ஆடுகளுக்கு தழை பறித்தபோது மரத்தில் இருந்து தவறி விழுந்து விவசாயி பலியான சம்பவம் அந்த பகுதியில் சோகத்தை ஏற்படுத்தி உள்ளது.