திண்டிவனம் அருகே ஒரே வகுப்பறையில் இயங்கும் தொடக்கப்பள்ளி நிதி ஒதுக்கியும் புதிய கட்டிடம் கட்டவில்லை என்று புகார்
திண்டிவனம் அருகே ஒரே வகுப்பறையில் ஊராட்சி ஒன்றிய தொடக்கப்பள்ளி செயல்பட்டு வருகிறது. நிதி ஒதுக்கியும் புதிய பள்ளி கட்டிடம் கட்டவில்லை என்று பொதுமக்கள் புகாா் கூறுகின்றனர்.
பிரம்மதேசம்,
திண்டிவனம் அருகே உள்ள கன்னிகாபுரத்தில் ஊராட்சி ஒன்றிய தொடக்கப்பள்ளி செயல்பட்டு வருகிறது. இப்பள்ளியில் நல்லாமூர், கூட்டேரிப்பட்டு, கீழ்எடையாளம், கன்னிகாபுரம் ஆகிய கிராமங்களை சேர்ந்த 57 மாணவ, மாணவிகள் கல்வி பயின்று வருகின்றனர். மேலும் பள்ளி தலைமை ஆசிரியர் உள்பட ஆசிரியர்கள் 2 பேர், பகுதிநேர ஆசிாியர்கள் 2 பேர், பள்ளி மேலாண்மைக்குழு சார்பாக நியமிக்கப்பட்ட 2 ஆசிரியர்கள் என மொத்தம் 6 ஆசிரியர்கள் இப்பள்ளியில் உள்ளனர். ஆனால் இப்பள்ளிக்கு ஒரே ஒரு கட்டிடம் உள்ளதால், அதில் 1-ம் வகுப்பு முதல் முதல் 3-ம் வகுப்பு வரை உள்ள மாணவர்கள் மட்டும் படித்து வருகின்றனர். 4 மற்றும் 5-ம் வகுப்பு மாணவர்கள் அருகில் உள்ள வீடுகள் மற்றும் வீட்டின் வளாகங்களில் கல்வி பயிலும் நிலை உள்ளது.
அடிப்படை வசதி இல்லை
மேலும் ஒரே வகுப்பறையில் 1 முதல் 3-ம் வகுப்பு வரையிலான மாணவர்களுக்கு பாடம் நடத்துவதால் அவர்களின் கல்வி பாதிக்கும் நிலை உள்ளது.
மேலும் பள்ளிக்கூடத்திற்கு என்று தனி சமையல் அறை இல்லை. இதனால் திறந்த வெளியில் சுகாதாரமற்ற முறையில் சமையல் செய்யப்பட்டு, மாணவர்களுக்கு வழங்கப்படுகிறது. இதுமட்டும் இன்றி பள்ளியில் விளையாட்டு மைதானம், கழிப்பறை போன்ற எந்த ஒரு அடிப்படை வசதிகளும் இல்லை. இதனால் மாணவர்கள் கடும் சிரமமடைந்து வருகின்றனர்.
ரூ.18 லட்சம் நிதி ஒதுக்கீடு
இதுகுறித்து தகவல் அறிந்த திண்டிவனம் அ.தி.மு.க. சட்டமன்ற உறுப்பினர் அர்ஜூனன் கடந்த 6 மாதங்களுக்கு முன்பு பள்ளியில் ஆய்வு மேற்கொண்டு, புதிய கட்டிடம் கட்ட திண்டிவனம் சட்டமன்ற தொகுதி மேம்பாட்டு நிதியில் இருந்து ரூ.18 லட்சத்தை ஒதுக்கினார். இருப்பினும் நிதி ஒதுக்கீடு செய்து 6 மாதங்கள் ஆன நிலையில், தற்போது வரை புதிய பள்ளி கட்டிடம் கட்ட எந்தவித நடவடிக்கையும் எடுக்கவில்லை. மேலும் அரசுக்கு சொந்தமான 1.5 ஏக்கர் புறம்போக்கு நிலம் அப்பகுதியில் உள்ளதாகவும், அங்கு புதிய கட்டிடம் அமைக்க வேண்டும் என்றும் பொதுமக்கள் தரப்பில் கோரிக்கை எழுந்து வருகிறது. ஆனால் பள்ளியில் கல்வி கற்பிப்பதற்கு போதுமான அளவிற்கு ஆசிரியர்கள் இருப்பதால், ஆண்டுக்கு, ஆண்டு மாணவ, மாணவிகளின் சேர்க்கை அதிகரித்து வருகிறது.
எனவே விரைவில் ஒன்றிய தொடக்கப்பள்ளிக்கு கூடுதல் கட்டிடம் கட்டித்தர வேண்டும் என்று மாணவர்களின் பெற்றோர் கோரிக்கை விடுத்துள்ளனர்.