புகார் பெட்டி

தெருநாய்கள் தொல்லை

ராமநாதபுரம் மாவட்டம் ஆர்.எஸ்.மங்கலம் மற்றும் அதனை சுற்றியுள்ள பகுதிகளில் தெருநாய்கள் அதிக அளவில் உள்ளன. இந்த நாய்கள் சாலையில் செல்லும் இரு சக்கர வாகனங்களின் மீது மேதுவதால் அடிக்கடி சிறு சிறு விபத்துகள் ஏற்படுகிறது. எனவே தொல்லை தரும் நாய்களை பிடித்து அப்புறப்படுத்த அதிகாரிகள் நடவடிக்கை எடுக்க வேண்டும்.

பொதுமக்கள், ஆர்.எஸ்.மங்கலம்.

கருவேல மரங்கள் அகற்றப்படுமா?

ராமநாதபுரம் மாவட்டம் திருப்பாலைக்குடி காந்திநகர் ஊராட்சி ஒன்றிய தொடக்கப்பள்ளி முதல் ரேஷன் கடை வரை உள்ள சாலையின் இருபுறமும் கருவேல மரங்கள் அதிக அளவில் வளர்ந்து உள்ளன. இதனால் நிலத்தடிநீர் மட்டம் பாதிக்கப்படும் நிலை உள்ளது. எனவே, சாலையில் இருபுறமும் உள்ள கருவேல மரங்களை அகற்ற அதிகாரிகள் நடவடிக்கை எடுக்க வேண்டும்.

சுல்தான் செய்யது, திருப்பாலைக்குடி.

நடவடிக்கை தேவை

ராமநாதபுரம் நகர் பகுதியில் சில கடைகளில் பொதுமக்கள் கொடுக்கும் 10 ரூபாய் நாணயங்களை வாங்க மறுக்கிறார்கள். இதனால் பொதுமக்கள் அலைக்கழிக்கப்படுகிறார்கள். எனவே இது தொடர்பாக சம்பந்தப்பட்ட அதிகாரிகள் விழிப்புணர்வு ஏற்படுத்தி 10 ரூபாய் நாணயங்களை வாங்க நடவடிக்கை எடுக்க வேண்டும்.

மனோகரன், ராமநாதபுரம்.

நூலக வாசகர்கள் அவதி

ராமநாதபுரம் மாவட்டம் டி பிளாக்கில் உள்ள நூலகத்தில் கடந்த சில மாதங்களாக தினசரி நாளிதழ் படிக்கும் பிரிவில் மின்விசிறி பழுதடைந்து உள்ளது. இதனால் வயதானவர்கள், குழந்தைகள் உள்ளிட்ட வாசகர்கள் மிகவும் சிரமத்திற்கு உள்ளாகின்றனர். எனவே மின்விசிறியை சரிசெய்து தர நிர்வாகம் நடவடிக்கை எடுக்க வேண்டும்.

பொதுமக்கள், ராமநாதபுரம்.

பஸ் வசதி வேண்டும்

ராமேசுவரத்தில் இருந்து ராமநாதபுரம் வழியாக ஊட்டி வரை இயக்கப்பட்ட அரசு பஸ் கொரோனா காலத்தில் நிறுத்தி வைக்கப்பட்டு பின்னர் மீண்டும் தொடங்கிய போது கோயம்புத்தூர் வரை மட்டுமே இயக்கப்படுவதால் ராமேசுவரத்தில் இருந்து ஊட்டி செல்லும் பயணிகள் சிரமப்படுகின்றனர். தற்போதைய கோடை காலத்தில் ஊட்டி வரை பஸ் இயக்க அதிகாரிகள் நடவடிக்கை எடுக்க வேண்டும்.

அஸ்மாபார்க் அன்வர்தீன், ராமேசுவரம்.