புகார் பெட்டி

கால்நடை மருத்துவமனை தேவை

சிவகங்கை மாவட்டம் கல்லல் அருகே பணங்குடி ஊராட்சியில் கால்நடை மருத்துவமனை வசதி கிடையாது. இதனால் இப்பகுதியில் பொதுமக்கள் வளர்த்து வரும் கால்நடைகளுக்கு நோய்பாதிப்பு ஏற்பட்டால் சிகிச்சைக்காக பலகிலோ மீட்டர் தூரம் செல்லும் நிலை உள்ளது. எனவே சம்பந்தப்பட்ட அதிகாரிகள் இப்பகுதியில் கால்நடை மருத்துவமனை அமைக்க நடவடிக்கை எடுக்க வேண்டும்.

சாலை சீரமைக்கப்படுமா?

சிவகங்கை மாவட்டம் கோட்டையூர் பேரூராட்சிக்கு உட்பட்ட எழில் நகர், தென்றல் நகர் போன்ற பகுதிகளில் உள்ள சாலைகள் மிகவும் சேதமடைந்து போக்குவரத்துக்கு ஆபத்தான நிலையில் உள்ளது. இதனால் இந்த பகுதியில் உள்ள மக்கள் மிகவும் சிரமப்படுகின்றனர். எனவே சேதமடைந்த சாலையை சீரமைக்க சம்பந்தப்பட்ட அதிகாரிகள் நடவடிக்கை எடுக்க வேண்டும்.

நாய்கள் தொல்லை

சிவகங்கை மாவட்டம் திருப்பத்தூர் பகுதி சாலையில் நாய்கள் அதிக அளவில் சுற்றி திரிகின்றன. இதனால் சாலையில் வாகனங்களை இயக்க முடியாமல் வாகனஓட்டிகள் சிரமப்படுகிறார்கள். மேலும் இரவுநேரங்களில் சாலையில் செல்வோரை துரத்தி சென்று கடிக்கிறது. எனவே அதிகாரிகள் உரிய நடவடிக்கை எடுத்து இப்பகுதியில் சுற்றித்திரியும் நாய்களை பிடித்து அப்புறப்படுத்த வேண்டும்.

கால்வாய்கள் சீரமைக்கப்படுமா?

சிவகங்கை மாவட்டம் எஸ்.புதூர் ஒன்றிய பகுதிகளில் கடந்த சில தினங்களாக பரவலாக மழை பெய்தது. இந்த நிலையில் பருவ மழை தொடங்கும் முன்பாக கண்மாய்களுக்கு வரும் வரத்து கால்வாய்களை சீரமைத்தால் மழைநீரை சேகரிக்க முடியும். எனவே, அதிகாரிகள் விரைந்து நடவடிக்கை எடுத்து வரத்து கால்வாய்களை சீரமைக்க வேண்டும்.

விபத்து அபாயம்

சிவகங்கை மாவட்டம் பள்ளத்தூரில் கால்நடை மற்றும் நாய்கள் சாலையில் அதிக அளவில் சுற்றித்திரிகின்றன. இதனால் தெருக்களில் நடந்து செல்ல முடியாமல் பொதுமக்கள் சிரமப்படுகிறார்கள். இரவு நேரங்களில் சாலையை மறித்து கொண்டு உறங்குவதால் விபத்து ஏற்படும் அபாயமும் உள்ளது. அதிகாரிகள் நடவடிக்கை எடுப்பார்களா?