செங்கம் அருகே விநாயகர் சிலை கரைப்பு நிகழ்ச்சியில் கைகலப்பு

செங்கம் அருகே விநாயகர் சிலை கரைப்பு நிகழ்ச்சியில் கைகலப்பு ஏற்பட்டது.

செங்கம் அருகே உள்ள மேல்செங்கம் அடுத்த துரிஞ்சாபுரம் பகுதியில் விநாயகர் சிலை விஜர்சனம் செய்யும் நிகழ்வு நேற்று முன்தினம் இரவு நடந்தது. இரு தரப்பினர்களிடையே ஏற்பட்ட வாக்குவாதம் முற்றி கைகலப்பாக மாறியது. இதனைத் தொடர்ந்து மேல்செங்கம் போலீஸ் நிலையத்தில் ஒரு தரப்பினர் புகார் மனு அளித்து எதிர்தரப்பு மீது நடவடிக்கை எடுக்க வேண்டும் எனக் கூறி திடீரென சாலை மறியலில் ஈடுபட்டனர்.

இந்த சாலை மறியல் சுமார் ஒரு மணி நேரத்திற்கு மேலாக நீடித்ததால் பெங்களூரு தேசிய நெடுஞ்சாலையில் இருபுறமும் சுமார் 2 கிலோ மீட்டர் தூரத்திற்கு வாகனங்கள் அணிவகுத்து நின்றதால் போக்குவரத்து பாதிப்பு ஏற்பட்டது. இதனால் இரவு நேரத்தில் வந்த பயணிகள் மிகுந்த அவதிக்கு உள்ளாகினர்.