ஆன்லைன் முதலீட்டு பணத்தை இரட்டிப்பாக்கி தருவதாக கூறி குன்னூர் தேயிலை ஏற்றுமதி நிறுவன உரிமையாளரிடம் ரூ.92¾ லட்சம் மோசடி-முகவர்கள் 3 போ் கைது

ஊட்டி

ஆன்லைன் முதலீட்டு பணத்தை இரட்டிப்பாக்கி தருவதாக கூறி குன்னூர் தேயிலை ஏற்றுமதி நிறுவன உரிமையாளரிடம் ரூ.92¾ லட்சம் மோசடி செய்யப்பட்டுள்ளது. இது தொடர்பாக முகவர்கள் 3 பேர் கைது செய்யப்பட்டு உள்ளனர்.

இதுகுறித்து போலீஸ் தரப்பில் கூறப்படுவதாவது:-

தேயிலை ஏற்றுமதி நிறுவன உரிமையாளர்

நீலகிரி மாவட்டம் குன்னூரை சேர்ந்த தேயிலை ஏற்றுமதி நிறுவன உரிமையாளரின் இன்ஸ்டாகிராமில் அறிமுகம் இல்லாத நபர் ஒருவர் ஒரு வலைத்தள முகவரி லிங்க் ஒன்றை அனுப்பியுள்ளார். இந்த லிங்கை கிளிக் செய்து, அதில் சில டாஸ்க்குகளை நிறைவேற்றி, அதன் மூலம் பணம் முதலீடு செய்தால் பணம் இரட்டிப்பாக தரப்படும் என்று ஆசை வார்த்தை கூறியுள்ளனர். இதை எளிதாக நம்பிய தேயிலை ஏற்றுமதி நிறுவன உரிமையாளர் கூடுதல் பணம் சம்பாதிக்க வேண்டும் என்ற ஆசையில் முதலில் 100 ரூபாய் முதலீடு செய்துள்ளார். அந்த பணம் இரட்டிப்பானதும் அதன் பின்னர் ஆயிரம் ரூபாய் முதலீடு செய்துள்ளார். ஆயிரங்கள் பின்னர் லட்சக்கணக்கில் மாறியது.

இவர் முதலீடு செய்த பணத்திற்கான இரட்டிப்புத்தொகை நேரடியாக இவரது வங்கிக் கணக்கிற்கு கொண்டு வரப்படாமல் ஆன்லைன் மூலம் வேறு ஒரு கணக்கில் இருப்பதாகவும், அந்த கணக்கில் இருந்து தேவைப்படும் சமயத்தில் உங்களது வங்கிக் கணக்கிற்கு மாற்றிக் கொள்ளலாம் என்றும் மோசடி பேர்வழிகள் இவரிடம் கூறியுள்ளனர். இதை நம்பிய அவர் தனது வங்கி கணக்குக்கு பணம் வராமலேயே வேறு ஒரு கணக்கில் தனக்கான தொகை இரட்டிப்பாகி வருகின்ற எண்ணத்தில் ரூ.40 லட்சம் முதலீடு செய்துள்ளார்.

ரூ.92¾ லட்சம் மோசடி

முடிவில் பணம் அதிக அளவில் கையை விட்டு சென்றது இவருக்கு தெரிய வந்தது. இதைத்தொடர்ந்து தனக்கான தொகையை தனது வங்கிக் கணக்கிற்கு மாற்றுமாறு கூறியுள்ளார். ஆனால் அவ்வாறு செய்ய முடியாது என்றும், நீங்கள் கூடுதல் பணம் முதலீடு செய்தால் மொத்த தொகையையும் வங்கி கணக்குக்கு மாற்றுவதாக கூறியுள்ளனர். இவ்வாறு கடந்த (செப்டம்பர்) ஒரு மாத காலத்தில் அவரிடம் சுமார் ரூ.92 லட்சத்து 77 ஆயிரத்து 839-யை ஏமாற்றி வாங்கியுள்ளனர். ஆனால் அவருக்கு அவருடைய பணம் திரும்ப கிடைக்கவில்லை. இதன் பின்னர் அவர்களை தொடர்பு கொள்ளவும் முடியவில்லை.

3 வாலிபர்கள் கைது

முடிவில் தான் ஏமாற்றப்பட்டதை உணர்ந்த தேயிலை ஏற்றுமதி உரிமையாளர் இதுகுறித்து ஊட்டி சைபர் கிரைம் போலீஸ் நிலையத்தில் புகார் அளித்தார். இதையடுத்து போலீஸ் சூப்பிரண்டு ஆஷிஷ் ராவத் உத்தரவின் பேரில் கூடுதல் போலீஸ் சூப்பிரண்டு மோகன் நிவாஸ் அறிவுறுத்தலில், இன்ஸ்பெக்டர்கள் சுபாஷினி, பிலிப், சுஜாதா ஆகியோர் தலைமையில் தனிப்படைகள் அமைக்கப்பட்டது.

விசாரணையில் இன்ஸ்டாகிராமில் லிங்க் அனுப்பி மோசடி செய்தவர்கள் தெலுங்கானா மாநிலம் மற்றும் தூத்துக்குடி, சேலம், தென்காசி உள்ளிட்ட பகுதிகளில் இருந்ததும், இவர்கள் ஒரு குடையில் நெட்வொர்க்காக குழு அமைத்து பணியாற்றியதும் தெரியவந்தது.

இதையடுத்து இவர்களை கைது செய்ய தனிப்படை போலீசார் வாரங்கல், தூத்துக்குடி, சேலம் உள்பட பல்வேறு இடங்களில் சுற்றி இந்த சம்பவங்களில் தொடர்புடைய 3 பேரை கைது செய்தனர்.

விசாரணையில் அவர்கள் சேலம் இளம்பிள்ளை பெருமாள் கவுண்டன்பட்டியை சேர்ந்த எழில் ராஜா (வயது 32), தென்காசி மாவட்டம் கடையநல்லூர் தலைவன் கோட்டை பகுதியை சேர்ந்த முத்துராஜ் (32), தென்காசி மாவட்டம் வெள்ளக்கல் பகுதியை சேர்ந்த பாலசுப்பிரமணியம் (27) என்பதும், இவர்கள் முகவர்களாக பணியாற்றி போலீசில் சிக்கிக் கொண்டதும், இந்த குழுவிற்கு தலைவனாக செயல்பட்டவன் வெளிநாட்டிற்கு தப்பி சென்றதும் தெரியவந்தது. இவர்கள் மீது இந்திய தண்டனை சட்டப்பிரிவு (420) ஏமாற்றுதல், இந்திய தகவல் சட்டம் 66 (டி) ஆகிய பிரிவுகளில் வழக்கு பதிவு செய்யப்பட்டுள்ளது.

இதில் போலீசாரிடம் சிக்காமல் தலைமறைவாக இருந்த எழில் ராஜா கோவையிலும், பாலசுப்பிரமணியம் மற்றும் முத்துராஜ் தூத்துக்குடியிலும் வைத்து கைது செய்யப்பட்டனர். இதன் பின்னர் இவர்கள் நீலகிரி மாவட்டம் ஊட்டிக்கு அழைத்து வரப்பட்டனர். விசாரணைக்கு பின்னர் குன்னூர் மாஜிஸ்திரேட்டு இசக்கி மகேஷ் குமார் முன்னிலையில் இவர்கள் 3 பேரையும் ஆஜர்ப்படுத்தி குன்னூர் சிறையில் போலீசார் அடைத்தனர்.

மேலும் இந்த சம்பவத்தில் தமிழ்நாடு முழுவதும் பலர் ஏமாந்து இருக்கலாம் என்றும், அவர்கள் புகார் அளித்த பின்னர் தான் மொத்தமாக எவ்வளவு பணம் மோசடி செய்யப்பட்டு உள்ளது என்பதும் தெரியவரும் என்று போலீசார் தெரிவித்தனர்.