நகரசபை கூட்டம்

மயிலாடுதுறை நகரசபை கூட்டம் அதன் தலைவர் செல்வராஜ் தலைமையில் நடந்தது. ஆணையர் செல்வகணபதி முன்னிலை வகித்தார். கூட்டத்தில் உறுப்பினர்கள் தங்களது கோரிக்கைகளை வலியுறுத்தி பேசியதாவது:-

ஜெயந்தி (அ.தி.மு.க.): தீப்பாய்ந்தாள் அம்மன் கோவில் பகுதியில் அமைந்துள்ள சுடுகாட்டை சீரமைக்க வேண்டும்.

தலைவர்: சுடுகாட்டை சீரமைக்க ரூ.20 லட்சத்திற்கு டெண்டர் விடப்பட்டுள்ளது.

கணேசன் (ம.தி.மு.க.): பாதாள சாக்கடை கழிவுநீர் சாலைகளில் வழிந்தோடுவதை தடுக்க வேண்டும்.

வடிகால்கள்

கல்யாணிரகு (தி.மு.க.): தெருக்களில் தினமும் அரை மணி நேரம் கூட குடிநீர் வினியோகம் செய்யப்படுவதில்லை. மழைகாலம் தொடங்கும் முன்பு வடிகால்களை சரிசெய்ய வேண்டும்.

ரமேஷ் (தி.மு.க.): மயிலாடுதுறையில் பிரசித்தி பெற்ற கடைமுக தீர்த்தவாரி அடுத்த மாதம் தொடங்க உள்ளதால் அப்பகுதியில் பாதாள சாக்கடை கழிவுநீர் வழிந்தோடுவதை தடுக்க விரைந்து நடவடிக்கை எடுக்க வேண்டும்.

ரிஷிகுமார் (தி.மு.க.): கடைமுக தீர்த்தவாரியின் போது தீர்த்தவாரி நடக்கும் இடமான நாலுகால் மண்டபம் பகுதியில் குப்பைகள் கொட்டப்பட்டு அசுத்தமாக காட்சி அளிக்கிறது.

ஆஸ்பத்திரி கழிவுகள்

மணிமேகலை (தி.மு.க.): அரசு ஆஸ்பத்திரி கழிவுகளை வாரம் 2 முறை சுத்தம் செய்ய வேண்டும்.

சம்பத் (தி.மு.க.) : மாப்படுகை சாலை காவிரி ஆற்றங்கரை சுடுகாட்டில் பழுதடைந்த மின் கம்பங்களை சீரமைக்க வேண்டும். ஹாஜியார் நகரில் குடிநீரில், பாதாள சாக்கடை கழிவு நீர் கலந்து வருகிறது.

ராஜலட்சுமி (தி.மு.க.): பாசிக்கடை தெருவில் மழைநீர் வடிகாலை சரி செய்ய வேண்டும். திருமஞ்சன வீதியில் உள்ள நடை பாலத்தை சீரமைக்க வேண்டும்.

சர்வோதயன் (தி.மு.க.) : எனது வார்டுக்கு உட்பட்ட பகுதிகளில் உள்ள வீடுகளில் குப்பை சேகரிக்கப்படுவதில்லை.

பாதாள சாக்கடை

கீதா(தி.மு.க.) : எனது வார்டுக்கு உட்பட்ட பகுதியில் ஈமக்கிரியை மண்டபம் அமைத்து தர வேண்டும்.

உஷாராணி (தி.மு.க.): ெரயில்வே பாதையில் கோழி கழிவுகள் கொட்டுவது தடுக்கப்பட வேண்டும். மழைக்காலம் தொடங்கும் முன்னர் பாதாள சாக்கடை பிரச்சினைக்கு நிரந்தர தீர்வு காண வேண்டும்.

சதீஷ்குமார்(அ.தி.மு.க): பொதுமக்கள், கலெக்டர் அலுவலகம் சென்றுவர ஏதுவாக மாயூரநாதர் வடக்கு வீதியில் பஸ் நிறுத்தம் அமைக்க வேண்டும்.

வளர்மதி (தி.மு.க.): கலைஞர் காலனியில் உள்ள சாலையை சீரமைக்க வேண்டும்.

ரஜினி (தி.மு.க.): ரயில்வே தண்டவாளம் அருகில் குப்பைகள் கொட்டுவதை நிறுத்த வேண்டும்.

இவ்வாறு உறுப்பினர்கள் பேசினர்.

முடிவில், துணைத்தலைவர் சிவக்குமார் நன்றி கூறினார்.