முதல்-அமைச்சர் வருகை: மதுரையில் இன்று போக்குவரத்து மாற்றம்

மதுரை,

தமிழக முதல்-அமைச்சர் மு.க.ஸ்டாலின் மதுரை புதுராம்நாட் ரோடு, சி.எம்.ஆர். ரோடு சந்திப்பில் அமைக்கப்பட்டுள்ள பாடகர் டி.எம்.சவுந்தர்ராஜனின் உருவ சிலையை திறந்து வைக்க வருகை தருகிறார். அதையொட்டி நகரில் இன்று மாலை முதல் இரவு வரை பஸ்கள், சரக்கு வாகனங்கள், லாரிகள் மற்றும் இதர வாகனங்களின் சாலை போக்குவரத்தில் கீழ்கண்டவாறு மாற்றம் செய்யப்படுகிறது.

அதன்படி விழாவிற்கு வரக்கூடிய சாலைகளான அனுப்பானடி ரோடு சந்திப்பு முதல் புதுராம்நாட் ரோடு, சி.எம்.ஆர். ரோடு, செயின்ட் மேரீஸ் சந்திப்பு முதல் பழைய குயவர் பாளையம் ரோடு, ஓபுளா படித்துறை முதல் சிமெண்டு ரோடு முனிச்சாலை ரோடு சந்திப்பு ஆகிய சாலைகளின் வாகன போக்குவரத்து காமராஜர் சாலையினை பயன்படுத்தி கீழ்கண்ட வகையில் தங்கள் இடங்களுக்கு செல்லுமாறு கேட்டுகொள்ளப்படுகிறது.

அனுப்பானடி ரோடு சந்திப்பிலிருந்து புதுராம்நாட் ரோடு மற்றும் சி.எம்.ஆர். ரோடு ஆகிய சாலைகள் வழியாக செல்லக்கூடிய வாகனங்கள் அனைத்தும் தெப்பக்குளம் 16-கால் மண்டபம் சென்று வலதுபுறம் திரும்பி காமராஜர் சாலை வழியாக செல்லலாம். செயின்ட் மேரீஸ் சந்திப்பு மற்றும் சிந்தாமணி ரோட்டிலிருந்து பழைய குயவர்பாளையம் வழியாக தெப்பக்குளம் நோக்கி வரும் அனைத்து வாகனங்களும் மஹால் ரோடு. கீழவாசல் சந்திப்பு சென்று காமராஜர் சாலை தெப்பக்குளம் நோக்கி செல்லலாம்.

நெல்பேட்டை மற்றும் ஓபுளா படித்துறையிலிருந்து தெப்பக்குளம் நோக்கி வரும் அனைத்து வாகனங்களும் அம்சவள்ளி சந்திப்பு, கீழவாசல் சந்திப்பு சென்று காமராஜர் சாலை வழியாக தெப்பக்குளம் செல்ல வேண்டும்.

காமராஜர் சாலையில் கீழவாசல் சந்திப்பு முதல் பழைய கணேஷ் தியேட்டர் வரை, பழைய குயவர்பாளையம் சாலையில் செயின்ட்மேரீஸ் சந்திப்பில் இருந்து முனிச்சாலை சந்திப்பு வரை போக்குவரத்திற்கு இடையூறாக வாகனங்களை நிறுத்த வேண்டாம் என்று போலீசார் தெரிவித்துள்ளனர்.