26-ந் தேதி தனியார் துறை வேலைவாய்ப்பு முகாம் வாகன பிரசாரத்தை கலெக்டர் தொடங்கி வைத்தாா்

கிருஷ்ணகிரி:

கிருஷ்ணகிரியில் 26-ந் தேதி தனியார் துறையினர் நடத்தும் வேலைவாய்ப்பு முகாம் குறித்த விழிப்புணர்வு வாகனத்தை கலெக்டர் சரயு கொடியசைத்து தொடங்கி வைத்தார்.

வேலைவாய்ப்பு முகாம்

கிருஷ்ணகிரி மாவட்ட கலெக்டர் அலுவலக கூட்ட அரங்கில் மக்கள் குறைதீர்க்கும் கூட்டம் நடந்தது. கலெக்டர் சரயு தலைமை தாங்கினார். கூட்டத்தில் பொதுமக்களிடம் வீட்டுமனை பட்டா, விலையில்லா தையல் எந்திரம், சலவைப்பெட்டி, முதியோர் உதவித்தொகை, சாலைவசதி மற்றும் மின் இணைப்பு போன்ற பல்வேறு கோரிக்கைகள் குறித்த மனுக்களை பல்வேறு தரப்பினர் கொடுத்தனர்.

மனுவை பெற்றுக்கொண்ட கலெக்டர், தகுதியான மனுக்கள் மீது துறை சார்ந்த அலுவலர்கள் உடனடியாக நடவடிக்கை எடுக்க வேண்டும். தகுதி இல்லாத மனுக்களுக்கு உரிய விளக்கத்தினை மனுதாரருக்கு தெரிவிக்க வேண்டும் என துறை சார்ந்த அலுவலர்களுக்கு அறிவுறுத்தினார்.

விழிப்புணர்வு வாகனம்

முன்னதாக, முன்னாள் முதல்-அமைச்சர் கருணாநிதியின் நூற்றாண்டு விழாவினையொட்டி கிருஷ்ணகிரி அரசு மகளிர் மேல்நிலைப்பள்ளியில் வருகிற 26-ந் தேதி தனியார் வேலைவாய்ப்பு முகாம் நடக்கிறது. இந்த முகாமை மாவட்ட நிர்வாகம் மற்றும் மாவட்ட வேலைவாய்ப்பு மற்றும் தொழில்நெறி வழிகாட்டும் மையம் இணைந்து நடத்தும் 150-க்கும் மேற்பட்ட முன்னணி தனியார் துறை நிறுவனங்கள் பங்குபெறும், மாபெரும் தனியார் துறை வேலைவாய்ப்பு நடைபெறுவதை பொதுமக்கள் மற்றும் வேலைநாடுனர்கள் அறிந்து கொள்ள ஏதுவாக விழிப்புணர்வு வாகனத்தை கொடியசைத்து தொடங்கி வைத்தார். கூட்டத்தில், மாவட்ட வருவாய் அலுவலர் சாதனைக்குறள், தனித்துணை ஆட்சியர் (சமூக பாதுகாப்பு திட்டம்) பன்னீர்செல்வம், மாவட்ட பிற்படுத்தப்பட்டோர் நலத்துறை அலுவலர் பத்மலதா, மாவட்ட ஆதிதிராவிடர் நலத்துறை அலுவலர் ரமேஷ்குமார், மாவட்ட வேலைவாய்ப்பு அலுவலர் கவுரிசங்கர் மற்றும் துறை சார்ந்த அலுவலர்கள் கலந்துகொண்டனர்.