ெரயில்வே ஊழியர் வீட்டில் வெடிகுண்டு வீச்சு

ரெயில்வே ஊழியர்

திருப்பத்தூர் மாவட்டம், வாணியம்பாடியை அடுத்த மேட்டுப்பாளையம் ஆபீசர்ஸ் லைன் பகுதியை சேர்ந்தவர் சந்திரன், ெரயில்வே ஊழியர். இவரது மனைவி இனியவள் (வயது 52). இவர்களுக்கு குகன் என்ற மகனும், ஆர்த்தி மற்றும் பிரீத்தி என்ற 2 மகள்களும் உள்ளனர்.

சந்திரன் கடந்த 5 வருடங்களுக்கு முன்பு இறந்துவிட்டார். அவருடைய பணி அவரது மகன் குகனுக்கு வழங்கப்பட்டு அவர் சேலத்தில் பணியாற்றி வருகிறார். இரு மகள்களும் திருமணம் ஆகி வெளியூரில் வசிக்கின்றனர். இதனால் வாணியம்பாடியில் இனியவள் மட்டும் தனியாக வசித்து வருகிறார்.

நாட்டு வெடிகுண்டு வீச்சு

இந்த நிலையில் நள்ளிரவு நேரத்தில் மோட்டார் சைக்கிளில் ஹெல்மெட் அணிந்து வந்த 2 மர்ம நபர்கள் இனியவள் வீட்டின் மீது கம்பி சுற்றப்பட்ட நாட்டு வெடிகுண்டை வீசிவிட்டு தப்பி சென்றுள்ளனர்.

இந்த நாட்டு வெடிகுண்டு பயங்கர சத்தத்துடன் வெடித்து சிதறியதில் வீட்டின் ஜன்னல் கண்ணாடிகள், மின் விளக்குகள், மற்றும் கதவு உடைந்து சேதமானது. உடனடியாக சத்தம் கேட்டு அருகில் இருந்தவர்கள் ஓடி வந்து பார்த்தபோது வீட்டின் முன்பு தீ மற்றும் புகை மண்டலமாக காட்சியளித்தது.

2 மர்ம நபர்கள்

மேலும் 2 பேர் அங்கிருந்து மோட்டார் சைக்கிளில் தப்பிச் சென்றுள்ளனர். பின்னர் வீட்டிற்குள் சென்று பார்த்தபோது காயமின்றி அதிர்ஷ்டவசமாக உயிர்த்தப்பிய இனியவளை வெளியே அழைத்து வந்து, இதுகுறித்து போலீசாருக்கு தகவல் தெரிவித்தனர். விரைந்து வந்த வாணியம்பாடி துணை போலீஸ் சூப்பிரண்டு விஜயகுமார், இன்ஸ்பெக்டர் பழனி ஆகியோர் தலைமையிலான போலீசார் அங்கு சிதறிக்கிடந்த வெடிகுண்டு துகள்கள், கம்பிகள் ஆகியவற்றை கைப்பற்றினர்.

மேலும் வெடிகுண்டு வீசிச்சென்றது யார்?, எதற்காக நாட்டு வெடிகுண்டு வீசினார்கள் என்பது குறித்து விசாரணை மேற்கொண்டு வருகின்றனர்.

போலீஸ் சூப்பிரண்டு விசாரணை

திருப்பத்தூர் மாவட்ட போலீஸ் சூப்பிரண்டு ஆல்பட் ஜான் நேரில் வந்து விசாரணை நடத்தினார்.

இச்சம்பவம் வாணியம்பாடி பகுதியில் பெரும் பரபரப்பை ஏற்படுத்தி உள்ளது. மேலும் நாட்டு வெடிகுண்டு வீசப்பட்ட இடத்தின் அருகாமையில் தனியாருக்கு சொந்தமான கியாஸ் குடோன் உள்ளது குறிப்பிடத்தக்கது.