மாற்றுத்திறனாளிகளுக்கு 3 சக்கர சைக்கிள்கள்

கிருஷ்ணகிரியில் நடந்த பொதுமக்கள் குறை தீர்க்கும் நாள் கூட்டத்தில் மாற்றுத்திறனாளிகளுக்கு 3 சக்கர சைக்கிள்களை கலெக்டர் தீபக் ஜேக்கப் வழங்கினார்.

குறை தீர்க்கும் நாள் கூட்டம்

கிருஷ்ணகிரி மாவட்ட கலெக்டர் அலுவலக கூட்ட அரங்கில் ெபாதுமக்கள் குறை தீர்க்கும் நாள் கூட்டம் நேற்று நடந்தது. இதற்கு மாவட்ட கலெக்டர் தீபக் ஜேக்கப் தலைமை தாங்கினார். இதில் மாவட்ட வருவாய் அலுவலர் ராஜேஸ்வரி, கலெக்டரின் நேர்முக உதவியாளர் (பொது) வேடியப்பன், தனி துணை கலெக்டர் சுகுமார் உள்பட பலர் கலந்து கொண்டனர்.

கூட்டத்தில் பொதுமக்கள் கலந்து கொண்டு வீட்டுமனை பட்டா, விலையில்லா தையல் எந்திரம், சலவை பெட்டி, முதியோர் உதவித்தொகை, சாலை வசதி, மின்சார வசதி உள்பட பல்வேறு கோரிக்கைகளை வலியுறுத்தி கலெக்டரிடம் மனு கொடுத்தனர். கூட்டத்தில் மொத்தம் 266 மனுக்கள் பெறப்பட்டன.

3 சக்கர சைக்கிள்கள்

இந்த மனுக்கள் மீது விசாரணை நடத்தி உரிய நடவடிக்கை எடுக்க துறை அலுவலர்களுக்கு கலெக்டர் உத்தரவிட்டார். தொடர்ந்து மாற்றுத்திறனாளிகள் நலத்துறை சார்பில் 3 மாற்றுத்திறனாளிகளுக்கு ரூ.9 ஆயிரத்து 50 வீதம் மொத்தம் ரூ.27 ஆயிரத்து 150 மதிப்பிலான 3 சக்கர சைக்கிள்களை கலெக்டர் வழங்கினார்.