ரெயில்வே பாதுகாப்பு படை சேவை குறித்த விழிப்புணர்வு பயணம்

சுதந்திர தினவிழாவையொட்டி, ரெயில்வே பாதுகாப்பு படை சார்பில் கடந்த 1-ந்தேதி மதுரையில் ரெயில்வே பாதுகாப்பு படை சேவை குறித்த விழிப்புணர்வு பயணம் தொடங்கியது.

ரெயில்வே பாதுகாப்பு படை போலீஸ் சப்-இன்ஸ்பெக்டர் முல்லர் தலைமையில் 12 போலீசார், 6 மோட்டார் சைக்கிள்களில் மதுரையில் இருந்து புறப்பட்டு விருதுநகர், தூத்துக்குடி, கன்னியாகுமரி, ராமேசுவரம் உள்ளிட்ட முக்கிய நகரங்களில் உள்ள ரெயில் நிலையங்களுக்கு சென்று பயணிகளுக்கு விழிப்புணர்வு ஏற்படுத்தினர். மேலும் ஒரு வேனில் விழிப்புணர்வு வாசகங்கள் அச்சிடப்பட்ட பதாகைகள் பொருத்தப்பட்டும், காணொலி காட்சி மூலமும் ரெயில் நிலையங்களில் விழிப்புணர்வு ஏற்படுத்தப்பட்டது.

அதன்படி மோட்டார் சைக்கிள்களில் விழிப்புணர்வு பயணம் மேற்கொண்டுள்ள ரெயில்வே பாதுகாப்பு படை போலீசார், திண்டுக்கல் ரெயில் நிலையத்துக்கு நேற்று மாலை வந்தனர். அவர்களுக்கு ரெயில் நிலைய மேலாளர் கோவிந்தராஜ், திண்டுக்கல் ரெயில்வே பாதுகாப்பு படை இன்ஸ்பெக்டர் சுனில்குமார் ஆகியோர் வரவேற்பு அளித்தனர். பின்னர் அவர்கள், ரெயில்வே பாதுகாப்பு படையின் சேவைகள் குறித்து பயணிகளுக்கு விளக்கமளித்து விழிப்புணர்வு ஏற்படுத்தினர். அதையடுத்து திருச்சி ரெயில் நிலையம் நோக்கி அவர்கள் புறப்பட்டு சென்றனர்.