பள்ளி மாணவரை தாக்கியவர் கைது

களக்காடு:

களக்காடு அருகே செட்டிமேடு பகுதியை சேர்ந்த பிளஸ்-2 மாணவர் ஒருவர், கடந்த சில நாட்களுக்கு முன்பு புதூர் வழியாக மோட்டார் சைக்கிளில் வேகமாக சென்றார். இதனை பார்த்ததும் புதூரை சேர்ந்த நாராயணன் மகன் இம்சன் (வயது 19), அவரது அண்ணன் வினோத் (22) ஆகியோர் அவரிடம் வேகமாக வந்ததாக கூறி தகராறு செய்தனர். இதனால் அவர்களுக்குள் முன்விரோதம் இருந்து வந்தது.

இந்நிலையில் சம்பவத்தன்று பிளஸ்-2 மாணவர் புதூர் பிள்ளையார் கோவில் அருகே வந்தபோது, இம்சனும், அவரது அண்ணன் வினோத்தும் வழிமறித்து அவரை அவதூறாக பேசி தாக்கினர். மேலும் கொலை மிரட்டலும் விடுத்தனர். இதுகுறித்து களக்காடு போலீசில் புகார் செய்யப்பட்டது. நாங்குநேரி துணை போலீஸ் சூப்பிரண்டு ராஜூ மற்றும் போலீசார் வழக்குப்பதிவு செய்து, விசாரணை நடத்தி இம்சனை கைது செய்தனர். வினோத்தை தேடி வருகின்றனர்.