வீடு புகுந்து தாய்-மகன் மீது தாக்குதல்

ஓமலூர்

ஓமலூரை அடுத்த வி.மேட்டூரை சேர்ந்தவர் சக்திவேல். இவருடைய மனைவி கோமதி. இவர் காடையாம்பட்டி சந்தைபேட்டையில் வசிக்கும் தனது தந்தைக்கு உடல்நிலை சரியில்லை என்றும், அவரை பார்த்து வருவதாகவும் கணவரிடம் கூறி உள்ளார். மேலும் அவர் தனது ஒரு வயது பெண் குழந்தையுடன் கடந்த 3 நாட்களுக்கு முன்பு தந்தை வீட்டுக்கு சென்றார். அதன்பிறகு அவர் வீடு திரும்பவில்லை. இதனால் சக்திவேல் தனது மனைவியை அழைத்து வர மாமனார் வீட்டுக்கு சென்றார். ஆனால் அவரது மனைவியை அழைத்த போது அவர் வர மறுக்கவே, குழந்தையை தூக்கி கொண்டு கொங்காரப்பட்டிக்கு சக்திவேல் வந்து விட்டார்.

இந்த நிலையில் கோமதியின் உறவினர்களான சந்தைபேட்டையை சேர்ந்த குபேந்திரன், சுரேஷ், மூர்த்தி மற்றும் அவருடைய மகன் என 4 பேர் சக்திவேலின் வீட்டுக்கு சென்றனர். அங்கு அவரையும், அவருடைய தாயார் அலமேலுவையும் தாக்கிவிட்டு குழந்தையை தூக்கிக்கொண்டு சென்றதாக கூறப்படுகிறது. இதில் பலத்த காயமடைந்த அலமேலு, அவருடைய மகன் சக்திவேல் ஆகிய 2 பேரும் ஓமலூர் அரசு ஆஸ்பத்திரியில் சிகிச்சைக்காக சேர்க்கப்பட்டனர். இது குறித்து அலமேலு தீவட்டிப்பட்டி போலீசில் கொடுத்த புகாரின் பேரில், குபேந்திரன், சுரேஷ், மூர்த்தி, மூர்த்தியின் மகன் என 4 பேர் மீதும் வழக்குப்பதிவு செய்து விசாரணை நடத்தி வருகின்றனர்.