சரக்கு வாகனம் மோதி உதவி தலைமை ஆசிரியர் பலி

பெண்ணாடம், 

பெண்ணாடத்தை அடுத்த ஏழுமலையான் நகரை சேர்ந்தவர் கலைச்செல்வன் (வயது 50). இவர் ஸ்ரீமுஷ்ணம் அருகே தாத்தாவட்டம் கிராமத்தில் உள்ள அரசு நடுநிலைப்பள்ளியில் உதவி தலைமை ஆசிரியராக பணியாற்றி வந்தார். இந்த நிலையில் கலைச்செல்வன் நேற்று வழக்கம்போல் பள்ளிக்கு மோட்டார் சைக்கிளில் புறப்பட்டார். விருத்தாசலம்-திட்டக்குடி நெடுஞ்சாலையில் முருகன்குடி அருகே சென்றபோது பின்னால் வந்த சரக்கு வாகனம் மோட்டார் சைக்கிள் மீது மோதியது. இதில் படுகாயம் அடைந்த கலைச்செல்வனை அந்த வழியாக சென்றவர்கள் மீட்டு சிகிச்சைக்காக 108 ஆம்புலன்ஸ் மூலம் விருத்தாசலம் அரசு ஆஸ்பத்திரியில் சேர்த்தனர். முதல் உதவி சிகிச்சைக்கு பின்னர், அங்கிருந்து மேல்சிகிச்சைக்காக சேலம் தனியார் ஆஸ்பத்திரியில் அனுமதிக்கப்பட்ட அவர் சிகிச்சை பலன் இன்றி பரிதாபமாக இறந்தார். இந்த விபத்து குறித்த புகாரின் பேரில் பெண்ணாடம் போலீசார் வழக்குப்பதிவு செய்து விசாரணை நடத்தி வருகின்றனர்.