வாகனம் மோதி வடமாநில முதியவர் சாவு

மகாராஷ்டிரா மாநிலம் அன்டர்சுல் நாசிக் பகுதியை சேர்ந்தவர் சந்திப். இவர் சுற்றுலா பயணிகளுக்கு வழிகாட்டியாக செயல்பட்டு வருகிறார். ஆண்டுதோறும் மகாராஷ்டிராவில் இருந்து சுற்றுலா பயணிகளை அழைத்துக்கொண்டு தமிழகம் வந்து செல்வது வழக்கம். இவ்வாறு அவர் 36 பயணிகளை ஏற்றிக்கொண்டு சுற்றுலா வாகனத்தில் திருப்பதி சென்றுவிட்டு சென்னை வழியாக ராமேசுவரம் வந்துள்ளார்.

ராமேசுவரம் செல்லும் வழியில் வழுதூர் பஸ் நிறுத்தம் பகுதியில் வாகனத்தை நிறுத்திவிட்டு கடையில் டீக்குடிக்க சென்றனர். அப்போது வதலே பாரம் நாசிக் பகுதியை சேர்ந்த கஸ்பாய் (வயது 75) என்பவர் சாலையை கடக்க முயன்றபோது அந்த வழியாக வந்த அடையாளம் தெரியாத வாகனம் அவர் மீது மோதிவிட்டு நிற்காமல் சென்றது. இதில் படுகாயம் அடைந்த கஸ்பாய் பரிதாபமாக இறந்தார். இந்த விபத்து குறித்து ராமநாதபுரம் கேணிக்கரை போலீசார் வழக்குப்பதிவு செய்து விசாரித்து வருகின்றனர்.