வெப்படையில் வாகனம் மோதி வாலிபர் பலி

பள்ளிபாளையம்:

வெப்படையில் பள்ளிபாளையம் சாலையில் பெட்ரோல் விற்பனை நிலையம் உள்ளது. இதன் அருகே நேற்று முன்தினம் இரவு 30 வயது மதிக்கத்தக்க வாலிபர் நடந்து சென்றார். அப்போது அந்த வழியாக சென்ற அடையாளம் தெரியாத வாகனம் அவர் மீது மோதியது. இதில் அவர் உடல் நசுங்கி சம்பவ இடத்திலேயே பலியானார். அந்த சமயம் மழை பெய்ததால் இதை யாரும் கவனிக்கவில்லை. இதனால் சுமார் ஒரு மணி நேரத்துக்கும் மேலாக வாலிபர் உடல் அங்கேயே கிடந்தது. மழை நின்ற பிறகு அந்த வழியாக சென்றவர்கள் வெப்படை போலீசுக்கு தகவல் தெரிவித்தனர். இதையடுத்து வெப்படை போலீசார் அங்கு சென்று வாலிபர் உடலை கைப்பற்றி பள்ளிபாளையம் அரசு ஆஸ்பத்திரிக்கு அனுப்பி வைத்தனர். மேலும் இந்த சம்பவம் குறித்து வழக்குப்பதிவு செய்த போலீசார், வாகனம் மோதி இறந்த வாலிபர் யார்?, எந்த ஊரை சேர்ந்தவர்?, அவர் மீது எந்த வாகனம் மோதியது? என விசாரணை நடத்தி வருகிறார்கள்.