விபத்தில் சிக்கிய பெண் மீது லாரி ஏறியதால் உடல் நசுங்கி பலி

பெண் பலி

கரூர் மாவட்டம், உப்பிட மங்கலம் அருகே உள்ள லிங்கத்தூர் சரளப்பட்டியை சேர்ந்தவர் சக்திவேல். இவரது மனைவி சம்பூர்ணம் (வயது 40). இவர் கரூரில் உள்ள தனியார் ஜவுளி ஏற்றுமதி நிறுவனத்தில் கூலி தொழிலாளியாக வேலை பார்த்து வந்தார். இந்தநிலையில் நேற்று முன்தினம் இரவு பணியை முடித்துவிட்டு கரூரில் இருந்து சரளப்பட்டிக்கு புலியூர்-உப்பிடமங்கலம் சாலையில் தனது ஸ்கூட்டரில் சம்பூரணம் சென்று கொண்டிருந்தார்.

அப்போது லிங்கத்தூர் நால்ரோடு பகுதியில் எதிர் திசையில் உப்பிடமங்கலம் ஜோதிவடத்தை சேர்ந்த ஆனந்த் (23) என்பவர் ஓட்டி வந்த மோட்டார் சைக்கிள் சம்பூர்ணம் ஓட்டி வந்த ஸ்கூட்டர் மீது எதிர்பாராதவிதமாக மோதியது. இதில் ஸ்கூட்டரில் இருந்து தூக்கி வீசப்பட்டு கீழே விழுந்த சம்பூர்ணத்தின் மீது அந்த வழியாக ஜல்லி கற்கள் ஏற்றி சென்ற டிப்பர் லாரியின் பின் சக்கரம் ஏறி இறங்கியது. இதில் தலை நசுங்கி சம்பூர்ணம் சம்பவ இடத்திலேயே பலியானார். மோட்டார் சைக்கிளில் இருந்து கீழே விழுந்த ஆனந்த் படுகாயம் அடைந்தார்.

போலீசார் விசாரணை

இதுகுறித்து தகவல் அறிந்த வெள்ளியணை போலீசார் சம்பவ இடத்திற்கு சென்றனர். பின்னர் படுகாயம் அடைந்த ஆனந்தை மீட்டு சிகிச்சைக்காக கரூர் அரசு மருத்துவக்கல்லூரி மருத்துவமனைக்கு அனுப்பி வைத்தனர். பின்னர் சம்பூர்ணத்தின் உடலை கைப்பற்றி பிரேத பரிசோதனைக்காக கரூர் அரசு மருத்துவ கல்லூரி மருத்துவமனைக்கு அனுப்பி வைத்தனர்.

இந்த விபத்து குறித்து வெள்ளியணை போலீசார் வழக்குப்பதிந்து விசாரணை நடத்தி வருகின்றனர்.