வாகனங்களை வழிமறித்த காட்டு யானை

வால்பாறை

வால்பாறை-சாலக்குடி சாலையில் வாகனங்களை காட்டு யானை வழிமறித்தது. இதனால் சுற்றுலா பயணிகள் கவனமாக செல்ல வேண்டும் என்று வனத்துறையினர் அறிவுரை வழங்கியுள்ளனர்.

சாலக்குடி சாலை

வால்பாறையில் இருந்து கேரள மாநிலம் சாலக்குடி செல்லும் சாலை அடர்ந்த வனப்பகுதியில் அமைந்துள்ளது. வனப்பகுதி என்பதால் இந்த சாலையில் அடிக்கடி காட்டு யானைகள், கரடி உள்ளிட்ட வனவிலங்குகளின் நடமாட்டம் காணப்படும். இதன் காரணமாக இந்த சாலையில் காலை 6 மணி முதல் மாலை 5.30 மணி வரை மட்டுமே வாகனங்கள் செல்ல அனுமதி அளிக்கப்பட்டுள்ளது.

தற்போது காலநிலை மாற்றத்தின் காரணமாக வால்பறை வனப்பகுதியில் இருந்து கேரள வனப்பகுதிக்கு காட்டு யானைகள் இடம்பெயர்ந்து வருகின்றன. இவ்வாறு செல்லும் காட்டு யானைகள் சில நேரங்களில் சாலையோர பகுதிகளில் முகாமிடுவது வழக்கம். இதனால் வாகன ஓட்டிகள் கவனமாக செல்ல வேண்டும் என்று வனத்துறையினர் அறிவுறுத்தி வருகின்றனர். மேலும் காட்டு யானைகளின் நடமாட்டத்தை வனத்துறையினர் கண்காணித்து வருகின்றனர்.

வழிமறித்த காட்டு யானை

இந்த நிலையில் சம்பவத்தன்று வால்பாறை-சாலக்குடி சாலையில் காட்டு யானை முகாமிட்டு, சாலையோரத்தில் இருந்த மரக்கிளைகளை முறித்து சாப்பிட்டுக்கொண்டிருந்தது. அப்போது அந்த வழியாக வந்த வாகனங்களையும் காட்டு யானை வழிமறித்தது. இதனால் அந்த வழியாக போக்குவரத்து பாதிக்கப்பட்டது.

தொடர்ந்து இதுகுறித்து தகவல் அறிந்து வந்த கேரள வனத்துறையினர் காட்டு யானையை வனப்பகுதிக்குள் விரட்டினர். இதையடுத்து போக்குவரத்து சீரானது.

தற்போது வால்பாறை-சாலக்குடி சாலையில் காட்டு யானைகள் உள்ளிட்ட வனவிலங்குகள் நடமாட்டம் அதிகரித்து உள்ளது. எனவே சுற்றுலா பயணிகள் மற்றும் வாகன ஓட்டிகள் கவனமாக செல்ல வேண்டும். வனவிலங்குகளை தொந்தரவு செய்யக்கூடாது என்று வனத்துறையினர் அறிவுரை வழங்கி வருகின்றனர்.